پاکستان کی سیکیورٹی فورسز نے خارجیوں اور افغان طالبان کی جانب سے پاکستانی پوسٹوں پر بِلااشتعال فائرنگ کا بھرپور جواب دیا ہے، جس کے نتیجے میں 15 سے زیادہ خارجی اور افغان طالبان ہلاک جبکہ متعدد زخمی ہوئے ہیں۔
سیکیورٹی ذرائع کے مطابق پاکستانی فورسز کی مؤثر جوابی کارروائی اور گولہ باری سے افغان طالبان 6 پوسٹیں چھوڑ کر بھاگ گئے۔ افغان سائیڈ پر نقصانات مزید بڑھنے کی بھی اطلاعات ہیں۔
مزید پڑھیں: فتنہ الخوارج اور سہولت کاروں کے خاتمے تک ان کا پیچھا کریں گے، آرمی چیف جنرل عاصم منیر
ذرائع نے بتایا کہ 27 اور 28 دسمبر کی رات فتنہ الخوارج کے 20 سے 25 دہشتگردوں نے افغان طالبان کی بارڈر پوسٹوں کا استعمال کرتے ہوئے کُرم اور شمالی وزیرستان میں 2 مقامات سے پاکستان میں در اندازی کی کوشش کی، جس کے جواب میں پاکستان کی سیکیورٹی فورسز نے بروقت کارروائی کرکے در اندازی کی کوشش ناکام بنا دی۔
سیکیورٹی ذرائع کے مطابق پاکستان کی سیکیورٹی فورسز کا کوئی جانی نقصان نہ ہونے اور صرف 3 سپاہیوں کے زخمی ہونے کی اطلاعات ہیں۔ پاکستان نے بارہا انٹرم افغان حکومت سے فتنہ الخوارج کو پاکستان کے خلاف اپنی سر زمین نہ استعمال کرنے کا کہا ہے، لیکن افغان طالبان فتنہ الخوارج کو کنٹرول کرنے اور دہشتگرد عناصر کی سرکوبی کرنے کے بجائے دہشتگردوں کی مسلسل معاونت کررہے ہیں۔
یہ بھی پڑھیں پشین اور ژوب میں آپریشن، 2 خوارجی ہلاک 5 گرفتار: آئی ایس پی آر
ذرائع کے مطابق فتنہ الخوارج کے دہشتگرد افغانستان میں پوری آزادی کے ساتھ موجود ہیں اور پاکستان مخالف دہشتگردانہ سرگرمیوں کے لیے افغان سر زمین کا بے دریغ استعمال کررہے ہیں۔ تاہم پاکستانی سیکیورٹی فورسز کسی بھی طرح کی جارحیت کا منہ توڑ جواب دینے کی صلاحیت رکھتی ہیں۔
