جمعیت علما اسلام (جے یو آئی) کے سربراہ مولانا فضل الرحمان سے ایران کے سفیر ڈاکٹر رضا امیر مقدم نے ملاقات کی ہے، اس موقع پر سربراہ جے یو آئی نے زور دیا کہ امت مسلمہ کو فلسطینیوں کے حق میں آواز بلند کرنی چاہیے۔ ان کا کہنا تھا کہ امریکا اور سامراجی قوتیں مسلم دنیا کو آپس میں لڑانے کی سازشیں کررہی ہیں۔
پاکستان میں متعین ایرانی سفیر ڈاکٹر رضا امیری مقدم نے وفد کے ہمراہ اسلام آباد میں مولانا فضل الرحمان سے ان کی رہائشگاہ پر ملاقات کی، اور ان کی صحت و تندرستی کے لیے نیک خواہشات کا اظہار کیا۔
یہ بھی پڑھیں اسرائیل کو تسلیم کرنے والے ’فتنے‘ کو ہم نے پاکستان سے ختم کر دیا ہے، مولانا فضل الرحمان
ملاقات میں ایران پاکستان تعلقات،علاقائی صورتحال بالخصوص غزہ میں جاری ناجائز صہیونی ریاست کی جارحیت پر تبادلہ خیال کیا گیا۔
اس موقع پر مولانا فضل الرحمان نے کہاکہ عالم اسلام فلسطینیوں کی حمایت میں مضبوط آواز بلند کرے، خطے کے اہم ممالک پاکستان، ایران، ترکیہ، سعودی عرب اور ملائیشیا دفاع غزہ اور اسرائیل کے خلاف ٹھوس اقدامات اٹھائیں۔
انہوں نے کہاکہ ہم نے پاکستانی عوام کے ساتھ مل کر پاکستان میں اسرائیل کو تسلیم کرنے کی سازش کو دفن کردیا ہے۔
اس موقع پر ایرانی سفیر نے کہاکہ فلسطین کی حمایت پر جے یو آئی کی کاوشوں اور پاکستان بھر میں شایان شان غزہ یکجہتی مظاہروں کے انعقاد پر سلام پیش کرتا ہوں۔
ڈاکٹر رضا امیری مقدم نے کہاکہ علمائے کرام بالخصوص آپ جیسے مدبر اور حکیم سیاسی رہنما سے تبادلہ خیال اور صلاح مشورہ کو ضروری سمجھتا ہوں۔
ملاقات میں مرکزی ترجمان جے یو آئی اسلم غوری، سابق رکن قومی اسمبلی مولانا محمد قاسم اور مفتی ابرار احمد شریک تھے۔
بعدازاں میڈیا سے مختصر گفتگو میں مولانا فضل الرحمان نے کہاکہ امریکا کبھی امت مسلمہ کا خیر خواہ نہیں رہا، ان کے ہمیشہ اپنے مفادات ہوتے ہیں۔
انہوں نے کہاکہ امریکا مسلسل صہیونی اسرائیلی ریاست کی پشت پناہی کررہا ہے، غزہ میں قیامت ڈھا دی گئی مگر انسانی حقوق کی یہ سنگین پامالیاں امریکا کو نظر نہیں آتیں۔
یہ بھی پڑھیں مولانا فضل الرحمان کی ایک اور کامیابی، مدارس رجسٹریشن آرڈیننس جاری کرنے کی منظوری
مولانا فضل الرحمان نے کہاکہ امریکا اور سامراجی قوتیں مسلم دنیا کو آپس میں لڑانے کی سازشیں کررہی ہیں، اسلامی دنیا کو فرقہ ورانہ کشیدگی میں دھکیلنے میں امریکا اور دیگر کی مکروہ سیاست ملوث ہے، ایسی سیاست کو انسانیت تو نہیں کہا جاسکتا۔
