کراچی: محبت میں دھوکا کھانے والی امریکی خاتون لڑکے کے گھر پہنچ گئی

پاکستانی نوجوان کی محبت میں گرفتار ہوکر کراچی پہنچنے والی امریکی خاتون لڑکے کے گھر پہنچ گئی ہے اور واپس جانے سے انکار کردیا ہے۔

امریکی خاتون گارڈن میں واقع اپارٹمنٹ کی پارکنگ میں جا کر بیٹھ گئی ہے، اور اس کا کہنا ہے کہ وہ واپس نہیں جائےگی۔

یہ بھی پڑھیں پیار میں دھوکا: پاکستانی نوجوان کی محبت میں گرفتار امریکی خاتون کراچی پہنچ کر دربدر ہوگئی

پولیس افسران خاتون سے ملاقات کے لیے گارڈن پہنچ گئے، جن میں ایس ڈی پی او ڈیفنس فائزہ، ڈی ایس پی گارڈن قیصر علی اور ڈی ایس پی گارڈن قیصرعلی شامل ہیں۔

خاتون کی ذہنی حالت ٹھیک نہیں، پولیس

ایس ڈی پی او ڈیفنس فائزہ کا کہنا ہے کہ خاتون کی ذہنی حالت ٹھیک نہیں، امریکی خاتون تنہا ہے، ہم اسے سیکیورٹی فراہم کررہے ہیں اور محفوظ مقام پر لے کر جائیں گے۔

پولیس کے مطابق نوجوان کے اہل خانہ گھر بند کرکے جا چکے ہیں جبکہ خاتون عمارت کی پارکنگ میں بیٹھی ہے، اب عمارت کی انتظامیہ نے فلیٹ کے دروازے بھی بند کر دیے ہیں۔

مجھے 3 ہزار ڈالر دیے جائیں، پھر بتاؤں گی کس سے شادی کرنی ہے، امریکی خاتون

امریکی خاتون کا کہنا ہے کہ مجھے 3 ہزار ڈالر دیے جائیں پھر بتاؤں گی کہ مجھے کس نوجوان سے شادی کرنی ہے، مجھے پاکستانی پاسپورٹ اور ہر ہفتے 2 ہزار ڈالر چاہییں۔

اس سے قبل یہ خبر آئی تھی کہ امریکی خاتون ایئرپورٹ سے ٹیکسی میں بیٹھ کر کسی نامعلوم مقام پر چلی گئی ہے۔ تاہم اب معلوم ہوا ہے کہ خاتون لڑکے کے گھر پہنچ گئی ہے۔

میڈیا رپورٹس کے مطابق ایئرپورٹ حکام نے فیصلہ کیا تھا کہ خاتون کو امریکی قونصل خانے کے حوالے کیا جائےگا، لیکن خاتون نے کہاکہ میں نے قونصل خانے میں نہیں جانا اپنے شوہر کے پاس جارہی ہوں۔

میڈیا رپورٹس کے مطابق امریکی قونصل خانے کی دو رکنی ٹیم کراچی ایئرپورٹ پہنچی تھی جہاں انہوں نے امریکی خاتون سے ملاقات بھی کی۔

میڈیا رپورٹس کے مطابق امریکی قونصل خانے کے حکام کا کہنا ہے کہ ہماری کوشش ہے خاتون کو واپس بھیج دیا جائے لیکن اگر خاتون اس بات پر آمادہ نہیں ہوتی تو ہم زبردستی نہیں کرسکتے۔

واضح رہے کہ کراچی کے علاقے گارڈن ویسٹ سے تعلق رکھنے والے 19 سال کے لڑکے کی محبت میں گرفتار ہوکر امریکی خاتون اونیا اینڈریو رابنسن پاکستان پہنچی تھی۔

’خاتون کا تعلق امریکا کی ریاست نیویارک سے ہے‘

خاتون کا تعلق امریکا کی ریاست نیویارک سے ہے جس کی عمر 33 برس بتائی جارہی ہے۔ جو پہلے سے شادی شدہ اور دو بچوں کی ماں ہے۔

خاتون کے کراچی پہنچنے پر لڑکے کے والدین یہ جان کر حیران ہوئے کہ خاتون ان کے بیٹے سے عمر میں تقریباً دو گنا بڑی ہے، اس کے علاوہ شوہر سے طلاق لے کر آئی ہے اور دوبچوں کی ماں بھی ہے۔

والدین کی ناراضی پر نوجوان اس خاتون کو چکمہ دے کر غائب ہوا تو خاتون جو رقم لائی تھی اس کی مدد سے کچھ دن گزارے اور پھر دربدر ہوگئی۔

یہ بھی پڑھیں پاکستانی نوجوان کی محبت میں کراچی آنے والی امریکی خاتون کا واپسی سے انکار

دو روز قبل خاتون کی جناح انٹرنیشنل ایئرپورٹ پر گورنر سندھ کامران ٹیسوری سے ملاقات ہوئی تھی، گورنر کامران ٹیسوری نے خاتون کو پریشانی کی حالت میں دیکھ کر فوری ویزا جاری کرا دیا تھا تاہم آج خاتون نے واپس امریکا جانے سے صاف انکار کردیا۔