سری لنکا کے شہر گال کرکٹ گراؤنڈ میں کھیلے گئے سیریز کے پہلے ٹیسٹ میچ میں آسٹریلیا نے سری لنکا کو ایک اننگزاور 242 رنز سے تاریخی شکست دے دی ہے۔
سری لنکا کے گال کرکٹ گراؤنڈ میں کھیلے جانے والے سیریز کے پہلے میچ کے تیسرے دن بارش کی وجہ سے تاخیر کے بعد شروع ہونے والی اننگز میں آسٹریلیا نے اپنا دباؤ برقرار رکھا اور صرف 2 سیشنز میں 15 وکٹیں حاصل کرکے بہترین کارکردگی کا مظاہرہ کیا اور سری لنکا کو بڑی شکست سے دوچار کیا۔
یہ بھی پڑھیں:کرکٹ ورلڈ کپ 2023: آسٹریلیا نے سری لنکا کو 5 وکٹوں سے شکست دے دی
آسٹریلیا نے 6 وکٹوں کے نقصان پر 654 رنز بنائے جو ایشیا میں اس کا سب سے بڑا اسکور تھا جس میں ڈیبیو کرنے والے جوش انگلیس نے شاندار سینچری بھی اسکور کی۔
میتھیو کوہنیمین بولنگ اٹیک کے اسٹار رہے جنہوں نے میچ میں 9 وکٹیں حاصل کیں جن میں پہلی اننگز میں 5 وکٹیں بھی شامل تھیں۔
مزید پڑھیں:ورلڈ کپ 2023: آج سری لنکا اور آسٹریلیا کی ٹیمیں مدمقابل ہوں گی
سری لنکا کو اپنی پہلی اننگز میں 165 رنز پر آؤٹ ہونے کے بعد فالو آن کھیلنا پڑا اور دوسری اننگز میں اسے ایک بار پھر مشکلات کا سامنا کرنا پڑا۔ دنیش چندیمل اور اینجلو میتھیوز کے درمیان 69 رنز کی مختصر شراکت کے باوجود سری لنکا کی ٹیم 247 رنز پر آؤٹ ہو گئی۔
آسٹریلیا کے بولرز خاص طور پر کوہنیمین اور نیتھن لیون کی شاندار بولنگ کے نتیجے میں میچ جلد ہی ختم ہو گیا۔
سری لنکا کی بیٹنگ لائن ایک بار پھر ریت کی دیوار ثابت ہوئی، سری لنکا کی میچ کی دونوں اننگز میں تیزی سے وکٹیں گرگئیں۔ کامیندو مینڈس کے ایک مختصر کیمیو نے کچھ امید جگائی، لیکن سری لنکا کے دیگر بلے باز جلد ہی آؤٹ ہو کر پویلین لوٹ گئے۔
یہ بھی پڑھیں:آئی سی سی چیمپیئنز ٹرافی کے لیے قومی ٹیم کا اعلان، فخر زمان سمیت کن کھلاڑیوں کی واپسی ہوئی؟
یہ شکست سری لنکا کی ٹیسٹ کرکٹ میں اب تک کی سب سے بڑی شکست ہے۔ دونوں ٹیموں کے درمیان دوسرا ٹیسٹ میچ 6 فروری کو شروع ہوگا جس میں آسٹریلیا اپنا دباؤ برقرار رکھنے جبکہ سری لنکا کی ٹیم میچ جیتنے کے لیے میدان میں اترے گی۔
