دفتر خارجہ نے کہا ہے کہ 5 فروری کو کشمیریوں کے ساتھ اظہاریکجہتی کا مقصد مقبوضہ کشمیر میں انسانی حقوق کی خلاف ورزیوں کو اجاگر کرنا ہے۔
ترجمان دفتر خارجہ شفقت علی خان نے کہاکہ آج پاکستان کی حکومت اور عوام ’یوم یکجہتی کشمیر‘ منا رہے ہیں، ہم اس عزم کا اظہار کرتے ہیں کہ کشمیریوں کے حق خودارادیت کے حصول کے لیے ان کی منصفانہ جدوجہد میں ان کے ساتھ کھڑے ہیں۔ آج کے دن کے موقع پرصدر، وزیراعظم اور نائب وزیراعظم نےخصوصی پیغامات جاری کیے ہیں۔
یہ بھی پڑھیں کشمیر ایک دن ضرور آزاد ہوگا، 10 جنگیں بھی لڑنا پڑیں تو لڑیں گے، آرمی چیف جنرل عاصم منیر
انہوں نے کہاکہ قومی قیادت نے اپنے پیغامات میں کشمیر کاز کے لیے پاکستان کی غیر متزلزل اخلاقی، سفارتی اور سیاسی حمایت کو اجاگر کیا۔ نائب وزیراعظم نے اقوام متحدہ سلامتی کونسل اور جنرل اسمبلی کے صدور، اقوام متحدہ کے سیکریٹری جنرل کو مقبوضہ جموں و کشمیر کی صورتحال پر خطوط لکھے ہیں۔
ترجمان نے کہاکہ نائب وزیراعظم نے اقوام متحدہ کے ہائی کمشنر برائے انسانی حقوق اور او آئی سی کے سیکریٹری جنرل کو بھی خطوط بھیجے۔ انہوں نے اقوام متحدہ سلامتی کونسل کی متعلقہ قراردادوں پر عمل درآمد کا مطالبہ کیا۔
شفقت علی خان نے کہاکہ نائب وزیراعظم نے کشمیری عوام کی مرضی کے تعین کے لیے اقوام متحدہ کے زیر اہتمام مقبوضہ کشمیر میں منصفانہ و غیر جانبدارانہ استصواب رائے کرانے پر زور دیا۔
انہوں نے کہاکہ اسحاق ڈار نے اقوام متحدہ اور او آئی سی کی قیادت پر بھی زور دیا کہ وہ مقبوضہ کشمیر میں انسانی حقوق کی صورتحال کو بہتر بنانے میں اپنا کردار ادا کریں۔
ترجمان نے کہاکہ یوم یکجہتی کشمیر سے قبل اسلام آباد میں مقیم سفارت کاروں کو مقبوضہ کشمیر کی صورتحال سے آگاہ کرنے کے لیے ایک بریفنگ کا اہتمام کیا گیا۔
شفقت علی خان نے کہاکہ یوم یکجہتی کشمیر کے موقع پر سیکریٹری خارجہ کی قیادت میں وزارت کے افسران اور عملے نے کانسٹی ٹیوشن ایونیو پر ’یوم یکجہتی واک‘ میں شرکت کی۔
یہ بھی پڑھیں یوم یکجہتی کشمیر، آزاد کشمیر کے عوام کا کشمیریوں کی غیرمتزلزل حمایت کا اعادہ
ترجمان کے مطابق اندرون ملک و دنیا بھر میں پاکستانی سفارتی مشنز میں سیمینارز، ویبنارز، عوامی ریلیوں اور تصویری نمائشوں سمیت دیگر سرگرمیوں کی ایک وسیع رینج کا انعقاد کیا جارہا ہے۔
