کرکٹ ورلڈ کپ جیتنے والی آسٹریلوی ٹیم کے اسٹار آل راؤنڈر مارکس اسٹوئنس نے فوری طور پر ون ڈے کرکٹ سے ریٹائرمنٹ کا اعلان کردیا ہے تاہم اب وہ ٹی20 کرکٹ میں مزید توجہ سے شرکت کریں گے۔
مارکس اسٹوئنس کو آئی سی سی چیمپیئنز ٹرافی 2025 میں شرکت کے لیے آسٹریلوی ٹیم کے ابتدائی 15 رکنی اسکواڈ میں شامل کیا گیا تھا، لیکن ان کی ون ڈے کرکٹ سے ریٹائرمنٹ کے بعد اب ان کے متبادل کھلاڑی کو 12 فروری تک حتمی اسکواڈ میں شامل کیا جائے گا۔
یہ بھی پڑھیں: چیمپیئنز ٹرافی سے قبل آسٹریلیا کو ایک اور جھٹکا، پیٹ کمنز کی شرکت مشکوک، اگلا کپتان کون ہوگا؟
اسٹار آسٹریلوی آل راؤنڈر کو حال ہی میں جنوبی افریقہ ٹی20 لیگ میں ڈربن کے سپر جائنٹس کی نمائندگی کرتے ہوئے دیکھا گیا ہے، جہاں مبینہ طور پر بولنگ کے دوران انھیں ہلکی ہیمسٹرنگ انجری کا سامنا کرنا پڑا تھا۔
اپنے ون ڈے کرکٹ کے دنوں کے خاتمے پر مارکس اسٹوئنس کی جانب سے اپنے کیریئر کے آخری مرحلے کو آسٹریلیا اور فرنچائز کی سطح پر ٹی20 فارمیٹ کے لیے وقف کرنے کی خواہش کا اظہار کیا گیا ہے۔
مزید پڑھیں: آسٹریلیا کا بڑا نقصان، اہم کھلاڑی چیمپیئنز ٹرافی سے آؤٹ
مارکس اسٹوئنس نے اپنا ون ڈے ڈیبیو 2015 میں انگلینڈ کے خلاف کیا تھا، وہ اب تک 71 ون ڈے میچ کھیل چکے ہیں، ان میچوں میں انہوں نے 64 اننگز میں 1495 رنز بنائے ہیں، جس میں ناقابل شکست 146 بھی شامل ہے، جو انہوں نے ایڈن پارک میں نیوزی لینڈ کے خلاف کھیلتے ہوئے بنائے تھے۔
مارکس اسٹوئنس نے اسی میچ میں 3 وکٹیں بھی حاصل کی تھیں، تیز رفتار کھلاڑی نے اپنے ون ڈے کیریئر میں 48 وکٹیں حاصل کی ہیں۔ 35 سالہ کرکٹر نے اپنا آخری ون ڈے 10 نومبر 2024 کو پرتھ میں پاکستان کے خلاف کھیلا تھا۔
مزید پڑھیں:آسٹریلوی وکٹ کیپر بلے باز میتھیو ویڈ نے بین الاقوامی کرکٹ سے ریٹائرمنٹ کا اعلان کردیا
آئی سی سی چیمپیئنز ٹرافی کا آغاز 19 فروری سے متوقع ہے، جس میں آسٹریلیا 22 فروری کو پاکستان کے شہر لاہور میں انگلینڈ کے خلاف ٹرافی ہنٹنگ کی اپنی مہم کا آغاز کرے گا۔
