پاکستان کرکٹ بورڈ (پی سی بی) کے چیئرمین محسن نقوی نے قذافی اسٹیڈیم کی تعمیر نو اور تزئین و آرائش کرنے والے ورکرز کو قذافی اسٹیڈیم میں سہ ملکی سیریز کا کل پاکستان اور نیوزی لینڈ کی ٹیموں کے درمیان ہونے والا میچ دیکھنے کی دعوت دی ہے۔
چیئرمین پی سی بی محسن نقوی نے قذافی اسٹیڈیم کی تعمیر اور تزئین و آرائش کرنے والے ورکرز کے اعزاز میں ظہرانہ دیا۔ اس موقع پر خطاب کرتے ہوئے انہوں نے ورکرز سے کہا کہ آپ نے قذافی اسٹیڈیم میں ہمارے ساتھ بیٹھ کر میچ دیکھنا ہے۔
یہ بھی پڑھیں: قذافی اسٹیڈیم کا افتتاح آج، محسن نقوی کی افتتاحی تقریب کے لیے بہترین انتظامات کی ہدایت
انہوں نے کہا کہ آج شام وزیراعظم شہباز شریف قذافی اسٹیڈیم کا افتتاح کریں گے، ان سے درخواست کروں گا جس نے بھی اس اسٹیڈیم کی تعمیر اور تزئین و آرائش میں بڑھ چڑھ کر حصہ لیا اس کے لیے ایوارڈ کا اعلان کیا جائے۔
انہوں نے کہا کہ یہ محسن نقوی کا کارنامہ نہیں بلکہ اس کے پیچھے پوری ٹیم کی محنت ہے، بہت سے لوگوں نے چیلنج کررکھا تھا کہ قذافی اسٹیڈیم کی تزئین و آرائش بروقت ممکن نہیں، اسٹیڈیم کی تزئین و آرائش کے لیے پہلے اسٹیڈیم کی ایک عمارت کو گرانے کا فیصلہ ہوا تو بہت سے لوگ گھبرائے ہوئے تھے کہ یہ وقت پر مکمل نہیں ہوسکے گی۔
یہ بھی پڑھیں: قذافی اسٹیڈیم کا افتتاح، گلوکاروں کی پرفارمنس پر شائقین کے لیے داخلہ فری
محسن نقوی کا کہنا تھا کہ سوشل میڈیا پر سننے میں آیا کہ اتنے کم عرصہ میں اسٹیڈیم کا کام کیسے ممکن ہوگا لیکن اللہ تعالی نے محنت کا اجر دیا اور ہم نے قذافی اسٹیڈیم کی تزئین و آرائش کا کام ریکارڈ مدت میں مکمل کیا۔
چیئرمین پی سی بی نے مزید کہا کہ آج پاکستان کے لیے خوشی اور فخر کا دن ہے، قذافی اسٹیڈیم کا کام مکمل ہوچکا ہے، اسٹیڈیم کی تزئین و آرائش کے لیے دن رات کام کیا۔ منفی پروپیگنڈے کے باوجود ہم نے ناممکن کو ممکن بنایا۔
یہ بھی پڑھیں: فیک نیوز سے وسیم اکرم بھی پریشان، ’میں نے محسن نقوی کے حوالے سے بیان نہیں دیا‘
۔انہوں نے کہا کہ محمد رضوان نیک نیت اور قابل کپتان ہیں، امید ہے کہ رضوان کی قیادت میں ہم چیمپیئنز ٹرافی ضرور جیتیں گے، قوم پاکستان کی سہ ملکی سیریز اور چیمپیئنز ٹرافی میں کامیابی کے لیے دعا کرے۔
محسن نقوی نے کہا کہ قذافی اسٹیڈیم کا کام مکمل ہوگیا ہے لیکن اس کی یادیں ہر اس فرد کے ساتھ ہمیشہ رہیں گی جس نے اس کی تزئین و آرائش میں حصہ ڈالا، یہ کسی ایک فرد کی نہیں بلک پاکستان اور ہم سب کی جیت ہے۔
