انڈیا کے مایہ ناز کرکٹر ویرات کوہلی نے بھارتی کرکٹ بورڈ کی جانب سے جاری کردہ نئے ضابطوں پر شدید تنقید کی ہے جن میں کرکٹ ٹورز کے دوران کھلاڑیوں کی فیملیز کے ان کے ہمراہ ٹھہرنے کو محدود کیا گیا ہے۔
ویرات کوہلی نے کہا کہ اگر آپ کسی بھی کھلاڑی سے پوچھیں گے کہ کیا وہ اپنے خاندان کو ٹورز کے دوران اپنے ساتھ رکھنا چاہتا ہے تو وہ ہاں میں جواب دے گا، میں نہیں چاہتا کہ (میچ کے بعد) اکیلے کمرے میں جاؤں اور افسردہ رہوں۔
انہوں نے کھلاڑیوں کے لیے ان کی فیملیز کے ساتھ ہونے کی اہمیت پر زور دیتے ہوئے کہا کہ میں نہیں بتا سکتا کہ باہر اگر کچھ شدید ہورہا ہے تو اس کے بعد فیملی کے پاس آنا کتنا خوشگوار تجربہ ہے۔
یہ بھی پڑھیے: چیمپیئنز ٹرافی فائنل:انڈیا کو بڑا دھچکا، اسٹار بلے باز ویرات کوہلی زخمی
ویرات کوہلی کو حال ہی میں دبئی میں چیمپیئنز ٹرافی کے دوران اپنی اہلیہ انوشکا شرما کے ہمراہ دیکھا گیا تھا جس کی ویڈیوز بھی وائرل ہوئیں۔ ان ویڈیوز میں انوشکا شرما کو اسٹینڈ سے ویرات کوہلی کی حوصلہ افزائی کرتے دیکھا جاسکتا ہے۔
واضح رہے کہ بورڈ آف کنٹرول فار کرکٹ ان انڈیا (بی سی سی آئی) کے نئے ضابطوں کے مطابق بین الاقوامی ٹورز کے دوران کھلاڑیوں کی فیملیز کے ان کے ہمراہ ٹھہرنے کو محدود کیا گیا ہے، اگر ٹور 45 دن سے زیادہ ہو تو محض 14 دن ہی کھلاڑیوں کی فیملیز ان کے ہمراہ رہ سکیں گی جبکہ انہیں ٹور کے 2 ہفتے گزرنے سے پہلے کھلاڑیوں کو جوائن کرنے کی اجازت نہیں ہوگی۔
