اسلام آباد: ون ویلنگ اور ڈرفٹنگ میں ملوث عناصر کے خلاف سخت کریک ڈاؤن کا فیصلہ

اسلام آباد ٹریفک پولیس نے ٹریفک قوانین کی خلاف ورزی کرنے والوں کے خلاف سخت فیصلے کرلیے۔

چیف ٹریفک آفیسر اسلام آباد کیپٹن (ر) ذیشان حیدر کی زیر صدارت اہم اجلاس ہوا، جس میں ون ویلرز اور ڈرفٹنگ میں ملوث عناصر کے خلاف سخت کریک ڈاؤن کا فیصلہ کیا گیا، اجلاس میں ایس پی ٹریفک، زونل ڈی ایس پیز اور بیٹ افسران نے شرکت کی۔

یہ بھی پڑھیں ’روک سکو تو روک لو‘، ون ویلنگ کرتے نوجوان کا اسلام آباد پولیس کو چیلنج، ویڈیو وائرل

زونل ڈی ایس پیز نے شاپنگ سینٹرز، مارکیٹوں میں ٹریفک کے بہاؤ اور رش کے متعلق بریفنگ دی۔

چیف ٹریفک آفیسر نے کہاکہ رمضان المبارک کی مناسبت سے مساجد، مارکیٹوں اور مراکز میں ٹریفک پولیس کی اضافی نفری تعینات کی گئی ہے۔

انہوں نے کہاکہ تمام چیکنگ افسران ضلع بھر کی مساجد، مارکیٹوں میں تعینات جوانوں کو روزانہ کی بنیاد پر بریف کریں، رمضان المبارک کے آخری عشرے میں مارکیٹوں میں ٹریفک کا رش ہوگا جس کو مؤثر حکمت عملی سے کم کرنا ہوگا۔

چیف ٹریفک آفیسر نے کہاکہ مارکیٹوں میں رش کے اوقات میں ٹریفک کو مؤثر طریقے سے کنٹرول کریں، اور ٹریفک قوانین کی خلاف ورزی کرنے والوں کے خلاف سخت کاروائیاں کریں۔

انہوں نے ہدایت کی کہ ون ویلرز اور ڈرفٹنگ میں ملوث عناصر کے خلاف سخت کریک ڈاؤن کریں۔

یہ بھی پڑھیں پولیس اہلکار کو گرانے کی کوشش کرنے والے ملزم کیخلاف قانونی کارروائی کا حکم

ان کا مزید کہنا تھا کہ ٹریفک کے بہاؤ میں خلل پیدا کرنے والی گاڑیوں کے خلاف سخت کارروائیاں عمل میں لائیں۔