عید کی چھٹیوں کے بعد سپریم کورٹ اور آئینی بینچ میں کچھ مقدمات کی سماعت ہوگی جو خاصی اہمیت کے حامل ہیں۔
عمران خان کے خلاف توہین عدالت کا مقدمہ
25 مئی 2022 کو پاکستان تحریک انصاف کی جانب سے ایک بیان حلفی سپریم کورٹ میں جمع کرایا گیا جس میں کہا گیا کہ اُن کا لانگ مارچ ڈی چوک آنے کی کوشش نہیں کرے گا لیکن لانگ مارچ ڈی چوک آیا، اِس پر اُس وقت کی پی ڈی ایم حکومت نے بانی پی ٹی آئی عمران خان کے خلاف توہینِ عدالت کی درخواست دائر کی تھی جس میں اٹارنی جنرل کی بجائے سینیئر وکیل سلمان اسلم بٹ کو سرکاری وکیل مقرر کیا گیا تھا۔
یہ بھی پڑھیں: 9 مئی مقدمات میں جے آئی ٹی کے سربراہ رہنے والے ڈی آئی جی پنجاب عمران کشور مستعفی کیوں ہوگئے؟
21 مارچ کو اِس مقدمے کی سماعت سلمان اسلم بٹ کی عدم پیشی کی وجہ سے غیر معینہ مدت کے لیے ملتوی کر دی گئی تھی جو اب عید کے بعد سماعت ہو گی۔
9 مئی مقدمات
9 اور 10 مئی سے متعلق مقدمات میں ضمانتوں پر رہائی پانے والے افراد کے خلاف پنجاب حکومت نے اپیلیں دائر کر رکھی ہیں کہ اُن کی ضمانتیں منسوخ کی جائیں۔
اِس مقدمے کی گزشتہ سماعت 10 مارچ کو ہوئی۔ چیف جسٹس یحییٰ آفریدی کی سربراہی میں 3 رُکنی بینچ نے اِس مقدمے کی سماعت کی۔
اِس مقدمے میں پنجاب حکومت نے سینئر وکیل ذوالفقار عباس نقوی کو وکیل مقرر کیا ہے۔ گزشتہ سماعت پر ذوالفقار عباس نقوی نے عدالت سے تیاری کے لیے وقت مانگا جس پر عدالت نے ناراضگی کا اظہار کرتے ہوئے سماعت عید کے بعد تک ملتوی کر دی تھی۔
فوجی عدالتوں میں سویلین ٹرائل
فوجی عدالتوں میں سویلینز کے ٹرائل سے متعلق مقدمہ سپریم کورٹ کے آئینی بینچ کے سامنے گزشتہ کئی ماہ سے زیرالتوا ہے۔
اِس مقدمے کی گزشتہ سماعت 13 مارچ جبکہ آئندہ سماعت 7 اپریل کے لیے مقرر ہے۔
سُپر ٹیکس سے متعلق مقدمہ
سپریم کورٹ آئینی بینچ میں ایک اہم مقدمہ سپر ٹیکس سے متعلق ہے۔
سپر ٹیکس بڑی انڈسٹریز اور 15 کروڑ سے زائد آمدن والے افراد پر عائد کیا گیا تھا جس کا مقصد دہشتگردی سے متاثرہ افراد کی بحالی تھا، اس ٹیکس کے خلاف درخواستوں کی سماعت سپریم کورٹ آئینی بینچ میں جاری ہے اور 7 اپریل کو اِس کی دوبارہ سماعت ہو گی۔
ارشد شریف قتل کیس
صحافی ارشد شریف کے قتل سے متعلق مقدمہ بھی سپریم کورٹ آئینی بینچ کے سامنے زیرِالتوا ہے۔
مزید پڑھیے: ارشد شریف کیس: ریاست نے سپریم کورٹ کے سامنے جرم تسلیم کر لیا، جسٹس محسن اختر کیانی کے ریمارکس
گزشتہ سماعت 7 مارچ کو ہوئی جس میں عدالت نے اِس بات پر ناراضگی کا اظہار کیا کہ کینیا کی ہائیکورٹ کی جانب سے جاری فیصلے کو عدالتی ریکارڈ کا حصہ کیوں نہیں بنایا گیا۔
کینیا ہائیکورٹ کے فیصلے کو عدالتی ریکارڈ کا حصہ بنانے کی ہدایت کرتے ہوئے آئینی بینچ نے ایک ماہ کے لیے سماعت ملتوی کی تھی جو ممکنہ طور پر 7 اپریل کو ہو گی۔
2024 انتخابی دھاندلی کیس
پاکستان تحریک انصاف اور شیر افضل مروت کی انتخابی دھاندلی سے متعلق درخواستوں پر اعتراضات کے ساتھ سماعت بھی عید کی چھٹیوں کے بعد ہو گی۔
28 فروری گزشتہ سماعت پرجسٹس امین الدین خان کی سربراہی میں 5 رکنی آئینی بینچ نے اِن درخواستوں پر نمبرز لگانے کی استدعا مسترد کر دی تھی۔
آئینی بینچ نے وکلا کو ہدایت کی رجسٹرار آفس کے اعتراضات کے خلاف تیار کریں۔
ججز ٹرانسفر کیس
اِسلام آباد ہائیکورٹ میں بلوچستان، سندھ اور لاہور ہائیکورٹس سے بذریعہ ٹرانسفر منتقل ہونے والے ججز کا معاملہ بھی کافی اہم ہے اور اِس کو لاہور ہائیکورٹ بار کے ساتھ ساتھ بانی چیئرمین پی ٹی آئی عمران خان نے بھی سپریم کورٹ کے آئینی بینچ میں چیلینج کیا ہوا ہے۔
گو کہ یہ معاملہ ابھی سماعت کے لیے مقرر نہیں ہوا لیکن عید کی چھٹیوں کے بعد مقرر ہو سکتا ہے۔
خیبر پُختونخوا میں اسکولوں کی حالتِ زار
اس بارے میں آئینی بینچ ازخود نوٹس کیس کی سماعت کر رہا ہے۔
گزشتہ سماعت پر آئینی بینچ نے تمام صوبائی متعلقہ سیکریٹریز کو طلب کیا ہوا تھا۔
مزید پڑھیں: سپریم کورٹ میں نئے تعینات ہونے والے ججز کون ہیں؟
ایڈیشنل ایڈووکیٹ جنرل کے پی نے عدالت کو بتایا کہ سیکریٹری تعلیم اور سیکریٹری خزانہ ہزارہ انٹرچینج پہنچ چُکے ہیں جبکہ سیکریٹری مواصلات کی جانب میڈیکل جمع کرایا گیا۔
اِس پر آئینی بینچ نے تمام سیکریٹریز کو ہدایت کی کہ آئندہ سماعت پر تمام سیکریٹریز حاضر ہوں۔ مزید سماعت 9 اپریل کو ہو گی۔
