امریکی صدر ڈونلڈ ٹرمپ نے وفاقی حکومت میں نئی بھرتیوں پر عائد پابندی میں مزید 3 ماہ کی توسیع کر دی ہے۔ اس حوالے سے جاری کیے گئے صدارتی میمورنڈم کے مطابق اب 15 جولائی تک کوئی نیا سول ملازم بھرتی نہیں کیا جائے گا اور نہ ہی کوئی نیا عہدہ تخلیق کیا جا سکے گا۔
میمورنڈم میں واضح کیا گیا ہے کہ یہ پابندی صرف سول ملازمین پر لاگو ہوگی، جبکہ فوجی، قومی یا عوامی سلامتی سے متعلقہ اسامیاں اور ایگزیکٹو آفس آف دی پریزیڈنٹ اس سے مستثنیٰ ہوں گے۔
مزید پڑھیں: ورلڈ کپ کوالیفائر: پاکستان ویمنز ٹیم نے مسلسل چوتھا میچ جیت لیا، تھائی لینڈ کو 87رنز سے شکست
وائٹ ہاؤس کی جانب سے جاری کردہ اعلامیہ کے مطابق اگر یہ پابندی 15 جولائی کے بعد ختم کر دی جاتی ہے تو ادارے ہر 4 سبکدوش ہونے والے ملازمین کے بدلے صرف ایک نئی بھرتی کر سکیں گے۔
اعلامیہ میں مزید کہا گیا ہے کہ صدر ٹرمپ کا مقصد ’سرکاری نظام کی اصلاح، غیر مؤثر پروگراموں کا خاتمہ اور حکومتی اخراجات میں کمی‘ ہے، اور اسی وژن کے تحت انہوں نے عہدہ سنبھالنے کے پہلے دن ہی بھرتیوں پر پابندی لگائی تھی۔
ٹرمپ انتظامیہ اس پالیسی کے تحت پہلے ہی ہزاروں وفاقی ملازمین کو برطرف کر چکی ہے تاکہ حکومتی سائز کو محدود اور اخراجات پر کنٹرول حاصل کیا جا سکے۔
