ایک طاقتور زلزلے نے ترکی کے اہم شہر استنبول سمیت شمال مغرب علاقوں کو بدھ کی دوپہر ہلا کر رکھ دیا، یورو-میڈیٹیرینین سیسمولوجیکل سینٹر نے زلزلے کی شدت 6.2 ریکارڈ کی ہے۔
زلزلہ استنبول کے مضافات میں سلویری سے دور بحیرہ مرمرہ میں آیا، جس کی شدت پڑوسی صوبوں میں بھی محسوس کی گئی ہے، تاہم ابھی تک کسی جانی نقصان کی اطلاع نہیں ملی ہے۔
The Sea of Marmara during the 6.2 magnitude earthquake that struck near Istanbul, Turkey, just moments ago. pic.twitter.com/3Sx6Tho6jX
— Republic (@republic) April 23, 2025
ترک وزیر داخلہ علی یرلیکایا نے سوشل میڈیا پر اعلان کیا کہ متعلقہ ریاستی اداروں نے ممکنہ نقصان کا اندازہ لگانے کے لیے فیلڈ سروے شروع کر دیا ہے۔ ’میں زلزلے سے متاثر اپنے شہریوں کی جلد صحت یابی کی خواہش کرتا ہوں۔‘
جرمن ریسرچ سینٹر فار جیو سائنسز یعنی جی ایف زیڈ کے مطابق ترکیہ میں آنیوالے زلزلے کی شدت ریکٹر اسکیل پر 6.02 ریکارڈ کی گئی جسے بعد میں اپڈیٹ کرتے ہوئے 6.2 بتایا گیا۔
امریکی جیولوجیکل سروے کے مطابق، زلزلے کی گہرائی 10 کلومیٹر تھی، جس کا مرکز بحیرہ مرمرہ میں استنبول سے تقریباً 40 کلومیٹر جنوب مغرب میں تھا، زلزلے کے جھٹکے شدت کے ساتھ محسوس کیے گئے، بہت سے لوگ خوف کے عالم میں گھروں سے باہر نکل آئے۔
استنبول سمیت مغربی ترکیہ کے علاقوں میں اس کے بعد کئی آفٹر شاکس آئے جن میں سے ایک کی شدت 5.3 تھی، ڈیزاسٹر اینڈ ایمرجنسی مینجمنٹ ایجنسی نے رہائشیوں کو عمارتوں سے دور رہنے کی تاکید کی ہے۔
