رواں ہفتے وفات پانے والے کیتھولک مسیحیوں کے مذہبی رہنما پوپ فرانسس کی آخری رسومات اور تدفین آج ہوگی جسے لائیو اسٹریمنگ کے ذریعے براہ راست نشر کیا جائے گا۔
پوپ کے تابوت کو گزشتہ رات 10 بجے سیل کردیا گیا جس سے پہلے قریباً ایک ہفتے تک ڈھائی لاکھ سے زائد لوگوں نے ان کا الوداعی دیدار کیا، پوپ فرانسس نے اپنی وصیت میں اپنی تدفین سادگی سے کرنے کی ہدایت کی تھی جس کے بعد انہیں عام لکڑی سے بنے تابوت میں رکھا گیا۔
یہ بھی پڑھیے: کیتھولک مسیحیوں کے روحانی پیشوا پوپ فرانسس کون تھے؟
پوپ فرانسس کی تدفین ان کی خواہش کے مطابق بیسیلیکا آف سینٹ مری چرچ میں ہوگی تاہم ان کی آخری رسومات ویٹیکن کے سینٹ پیٹر چرچ میں ادا کی جائیں گی۔
وہ گزشتہ ایک صدی سے ویٹیکن کے سینٹ پیٹرک سے باہر دفن کیے جانے والے پہلے پوپ ہیں، ان سے قبل بیشتر پوپ آخری آرام گاہ کے طور پر مسیحیوں کے مقدس مقام اور کیتھولک عیسائیت کے مرکز ویٹیکن کے سینٹ پیٹر چرچ کا انتخاب کرتے تھے جہاں 140 سے زائد پوپ دفن ہیں۔
پوپ فرانسس کی آخری رسومات میں امریکی صدر ڈونلڈ ٹرمپ، برطانوی وزیراعظم کیر اسٹارمر، فرانسیسی صدر ایمانویل میکرون، یوکرین کے صدر ویلادیمیر زلنسکی اور سابق امریکی صدر جو بائیڈن سمیت اہم شخصیات شرکت کریں گے۔
یہ بھی پڑھیے: پوپ فرانسس چل بسے، ویٹیکن کا باضابطہ اعلان
پوپ فرانسس کی تدفین کے بعد 9 دنوں کا سرکاری سوگ منایا جائے گا جس کے بعد نئے پوپ کے انتخاب کے لیے دنیا بھر سے 252 کارڈینلز ویٹیکن میں جمع ہوں گے۔
