ملک بھر میں گرمی کی لہر میں ہر گزرتے دن کے ساتھ اضافہ ہوتا جا رہا ہے، جوں جوں سورج آنکھیں دکھا رہا ہے درجہ حرارت میں بھی اضافہ ہورہا ہے۔ ایسے میں کوئٹہ کے باسی بڑھتی گرمی اور لوڈ شیڈنگ سے شدید پریشان ہیں، لیکن کوئٹہ کے مقامی افراد نے گرمی اور لوڈ شیڈنگ کا حل نکال لیا ہے۔
یہ بھی پڑھیں دن میں 12 گھنٹے اے سی، روم کولر اور پنکھا چلانے سے کتنے یونٹ خرچ ہوں گے؟
کوئٹہ کے وسط میں واقع قندھاری بازار میں ان دنوں دیسی ساختہ ایئر کولر تیار کیے جا رہے ہیں، ان ایئر کولرز میں پلاسٹک کی گول باڈی میں پنکھا اور مشین فٹ کی جاتی ہے اس کے بعد پانی کو کھینچنے والا پمپ نصب کرکے سائیڈوں پر بھوسا لگا دیا جاتا ہے اور یوں کم داموں میں دیسی ساختہ کولر تیار ہو جاتا ہے۔
وی نیوز سے بات کرتے ہوئے کولر فروخت کرنے والے دکاندار نے بتایا کہ یہ کولر بیٹری، سولر اور بجلی تینوں پر بآسانی چل جاتے ہیں ان دنوں مارکیٹ میں کولر کی مانگ میں اضافہ دیکھنے کو ملا ہے، ان کولروں کی قیمت برانڈڈ اور ایران سے آنے والے کولروں سے انتہائی کم ہے۔
’چھوٹا کولر 2800 سے 3200 روپے کے درمیان جبکہ بڑا کولر 3500 سے 4 ہزار روپے کے درمیان مل جاتا ہے۔‘
یہ بھی پڑھیں کم خرچ روم کولر: ’ اب اے سی بیٹری پر بھی چلا سکتے ہیں‘
وی نیوز سے بات کرتے ہوئے ایک شہری نے کہاکہ جب سے یہ دیسی ساختہ کولر مارکیٹ میں آئے ہیں تب سے غریب عوام کی زندگی آسان ہو گئی ہے۔ ڈھائی تین ہزار میں ہم یہ کولر خرید کر ایک چھوٹی سی بیٹری لگا دیتے ہیں اور یوں بجلی کی لوڈ شیڈنگ کے دوران بھی موسم کی شدت سے بچنا ممکن ہو جاتا ہے۔
