پاکستان کے تمام بڑے شہروں میں (سوائے کراچی کے) بجلی کی لوڈ شیڈنگ نہ ہونے کے برابر ہے، لیکن روشنیوں کے شہر کے نام سے مشہور معاشی حب کراچی تاریکی میں ڈوبا ہوا ہے۔
ان دنوں شہر کا ہر علاقہ لوڈ شیڈنگ سے متاثر ہے، جن مقامات پر عام دنوں میں بجلی نہیں جاتی وہاں بھی مرمتی کی بنیاد پر بجلی منقطع کردی جاتی ہے، شہر کراچی کی مجموعی صورت حال یہ ہے کہ شہریوں کو کم سے کم 2 گھنٹے اور زیادہ سے زیادہ 20 گھنٹے بجلی بندش کا سامنا ہے جبکہ درجہ حرات 35 سے 40 ڈگری سینٹی گریڈ تک پہنچ گیا ہے۔
یہ بھی پڑھیں حکومت سندھ اور کے الیکٹرک کے درمیان واجبات کا معاملہ مزید سنگین ہو گیا، بدترین لوڈشیڈنگ کاخدشہ
اس وقت سب سے زیادہ پریشانی کا سامنا ان آبادیوں کو ہے جہاں بجلی چوری ہورہی ہے، بلدیہ ٹاؤن، گلستان جوہر، ملیر، ضلع وسطی و ضلع کیماڑی کے اکثر علاقوں میں لوڈ شیڈنگ کا دورانیہ 16 سے 20 گھنٹوں تک ہے۔
کے الیکٹرک کے ایک صارف نے بتایا کہ گلستان جوہر میں 16 سے 18 گھنٹے تک کی لوڈ شیڈنگ ہورہی ہے۔ جب کے الیکٹرک کے دفتر فون کیا تو انکا کہنا تھا کہ آپ کے ہاں بجلی چوری ہورہی ہے اس لیے لوڈشیڈنگ کی جارہی ہے۔
صارف نے بتایا کہ نمائندے سے بات کرتے ہوئے ان کا مؤقف تھا کہ اگر چوری ہو رہی ہے تو اسے روکنا کس کا کام ہے اور اس شدید گرمی میں کیوں آپ بجلی بند کر رہے ہیں اور اس کی سزا سب کو کیوں دی جا رہی ہے۔
صارف کے مطابق المیہ یہ ہے کہ چوری کرنے اور نہ کرنے والے اس وقت برابر ہیں، اگر میں وقت پر بجلی کے بل ادا کرتا ہوں اور بجلی چوری نہیں کرتا، تو میرے اور بجلی چوری کرنے والوں کے ساتھ یکساں سلوک کیوں کیا جارہا ہے۔ ایسے میں تو پھر مجھے بھی بجلی چوری کرنے پر مجبور کیا جارہا ہے۔
دوسری جانب کے الیکٹرک یہ دعویٰ کررہی ہے کہ کے الیکٹرک کے نیٹ ورک کے 70 فیصد علاقوں کو بجلی کی فراہمی معمول کے مطابق جاری ہے۔
یہ بھی پڑھیں سندھ ہائیکورٹ نے کے الیکٹرک سے بجلی کی پیداوار اور لوڈ شیڈنگ کا پلان طلب کرلیا
ترجمان کے الیکٹرک کے مطابق کے الیکٹرک کے 30 فیصد نیٹ ورک پر لوڈ مینجمنٹ کی جاتی ہے، علاقہ مکین وقت پر بلوں کی ادائیگی کو یقینی بنائیں، لوڈشیڈنگ کا دورانیہ علاقے میں ہونے والی بجلی چوری اور بلوں کی بروقت ادائیگی پر منحصر ہے، علاقائی فالٹز کے لیے کے الیکٹرک کی ویب سائٹ یا ہیلپ لائن 118 پر 24 گھنٹے رابطہ کر سکتے ہیں۔
