پاک فوج کے ترجمان لیفٹیننٹ جنرل احمد شریف چوہدری نے کہا ہے کہ بھارت کی جانب سے شرمناک حملہ کیا گیا ہے جس کا بھرپور جواب دیا جارہا ہے۔ بھارتی حملوں میں 8 پاکستانی شہید جبکہ 33 زخمی ہوگئے۔
راولپنڈی میں پریس کانفرنس کرتے ہوئے انہوں نے کہاکہ بھارت نے 6 مقامات پر 24 حملے کیے، احمد پور شرقیہ میں معصوم بچی سمیت 5 پاکستانی شہید ہوگئے۔
انہوں نے کہاکہ بھارت نے مظفرآباد میں مسجد کو نشانہ بنایا، جس کے نتیجے میں ایک بچی زخمی ہوئی اور مسجد کو نقصان پہنچا، جبکہ کوٹلی میں مسجد عباس کو نشانہ بنایا گیا، اس کے علاوہ مریدکے میں بھی مسجد پر میزائل داغے گئے جس میں ایک شہری شہید اور ایک زخمی ہوگیا۔
لیفٹیننٹ جنرل احمد شریف نے کہاکہ بھارتی فوج نے سیالکوٹ کے علاقے کوٹلی لوہاراں میں ایک میزائل داغا، جبکہ شکر گڑھ میں ایک ڈسپنسری کو نقصان پہنچایا گیا ہے۔
انہوں نے کہاکہ دشمن کے بلاجواز حملہ کا پاکسانی فوج بھر پور جواب دے رہی ہے، آج دن میں تمام میڈیا کو ان مقامات پر لے جایا جائے گا، تاکہ بھارت کی ننگی جارحیت کو ساری دنیا دیکھے۔
واضح رہے کہ بھارت نے مظفرآباد، کوٹلی، بہاولپور، احمد پور شرقیہ اور مریدکے میں میزائل داغے ہیں، جس کے جواب میں پاک فوج نے بھرپور کارروائی کی ہے اور دشمن کے 3 جنگی جہاز مار گرانے کے ساتھ ساتھ بریگیڈ ہیڈکوارٹر بھی تباہ کردیا۔
