اینٹی کرپشن کورٹ گجرات نے سابق وزیراعلیٰ پنجاب و مرکزی صدر تحریک انصاف چوہدری پرویزالٰہی کی دو مقدمات میں عبوری ضمانت منظور کرلی۔
چودھری پرویزالٰہی اینٹی کرپشن گجرات بدھ کو جج رانا محمد سلیم کی عدالت میں پیش ہوئے۔ عدالت نے گوجرانوالہ اور گجرات کے دونوں مقدمات میں ان کی 23 مئی تک عبوری ضمانت منظور کر لی اور پولیس کو ان کی گرفتاری سے روک دیا۔
’نواز، شہباز منافقوں کا ٹولہ ہے‘
بعد ازاں چودھری پرویزالٰہی نے میڈیا سے گفتگو کرتے ہوئے کہا کہ ہم عدالتوں کا دل سے احترام کرتے ہیں۔ انہوں نے مزید کہا کہ نواز شریف اور شہباز شریف کے سابق کردار کو دیکھتے ہوئے کہہ سکتے ہیں کہ یہ منافقو ں کا ٹولہ ہے۔
انہوں نے کہا کہ محسن نقوی سراسر جھوٹ کی بنیادوں والے وزیراعلیٰ ہیں اور سپریم کورٹ کا فیصلہ آ رہا ہے پھر سب ٹھیک ہو جائے گا۔
چودھری پرویزالٰہی نے کہا کہ ہماری قیادت کو سب پتہ ہے یہ حکمران ایک طرف مذاکرات اور دوسری طرف چھاپے مارتے ہیں لیکن اب ایسے نہیں چلے گا۔
ان کا کہنا تھا کہ خواجہ آصف نے نواز شریف اور شہباز شریف کا اصل روپ قوم کے سامنے پیش کر دیا ہے یہ ہر معاملے میں جھوٹ بولتے ہیں۔ ان کا مزید کہنا تھا یہ حکومت بھی کر رہے ہیں اور اپوزیشن بھی ان کے چہرے بے نقاب ہوچکے ہیں۔
