لاہور ہائیکورٹ نے سابق وزیراعلٰی پنجاب عثمان بزدار کو اپنے خلاف درج مقدمات میں شاملِ تفتیش ہونے کی ہدایت کرتے ہوئے ریمارکس دیے کہ آج شامل تفتیش نہ ہونے کی صورت میں گرفتاری سے روکنے کی درخواست مسترد کردی جائے گی۔
سابق وزیر اعلٰی پنجاب عثمان بزدار کی جانب اپنی ممکنہ گرفتاری کے خلاف درخواست پر سماعت لاہور ہائیکورٹ کے جسٹس طارق سلیم شیخ نے کی۔
عثمان بزدار کے وکیل نے موقف اختیار کیا کہ نگران حکومت سیاسی بنیادوں پر مقدمات درج کررہی ہے۔ اینٹی کرپشن حکام نے گرفتار کرنے کی کوشش کی ہے خدشہ ہے کہ پولیس کسی وقت بھی خفیہ مقدمے میں گرفتار کر سکتی ہے۔
سابق وزیر اعلٰی پنجاب کے وکیل کا کہنا تھا کہ عثمان بزدار متعلقہ عدالت سے ضمانت کے خواہاں اور شاملِ تفتیش ہونا چاہتےہیں۔ استدعا ہےکہ عدالت ڈی جی اینٹی کرپشن ڈیپارٹمنٹ کو درج نامعلوم مقدمات کا ریکارڈ فراہم کرنے کا حکم دے۔
ایڈیشنل ایڈووکیٹ جنرل غلام سرور نہنگ کا موقف تھا کہ اینٹی کرپشن میں مقدمہ درج ہونے کےباوجود گرفتاری کےلیے عدالتی حکم ضروری ہے۔عثمان بزدار آج تک تفتیش میں شامل نہیں ہوئے۔ تفتیش میں شامل ہونے کی بجائے تفتیشی عمل روکنے کی درخواست دائر کردی۔
اس موقع پر جسٹس طارق سلیم شیخ نے عثمان بزدار کودرج مقدمات میں آج ہی شامل تفتیش ہونے کی ہدایت کرتے ہوئے ریمارکس دیے کہ اگر عثمان بزدار آج شامل تفتیش نہ ہوئے تو گرفتاری سے روکنے کی درخواست مسترد کردی جائے گی۔
ان ریمارکس کے ساتھ عدالت نے کیس کی سماعت 5 مئی تک ملتوی کردی ہے۔
