پاکستان نے بنگلہ دیش کو دوسرے ٹی 20 میں 57 رنز سے ہراکر 3 میچوں کی سیریز میں صفر 2 کی فیصلہ کن برتری حاصل کرلی۔
یہ بھی پڑھیں: پہلا ٹی20: پاکستان نے بنگلہ دیش کو 37 رنز سے شکست دے دی
جمعے کے روز لاہور کے قذافی اسٹیڈیم میں کھیلے گئے دوسرے میچ میں پاکستان کے دیے ہوئے 202 رنز کے ٹارگٹ کے جواب میں مہمان ٹیم 19 اوورز میں 9 وکٹوں پر 144 رنز بناسکی۔ شریف الاسلام زخمی ہونے کی وجہ سے بیٹنگ نہیں کرسکے۔
مہمان ٹیم کے تنظیم حسن 50 رنز اور تنزید حسن 33 رنز کے ساتھ نمایاں رہے۔
پاکستان کی جانب سے ابرار احمد سب سے نمایاں بولر رہے جنہوں نے 3 کھلاڑی آؤٹ کیے۔ یہ وکٹیں انہوں نے 4 اوورز میں 19 رنز کے عوض حاصل کیں۔ حسن علی، فہیم اشرف، حارث رؤف، شاداب خان، خوشدل شاہ اور صائم ایوب نے ایک ایک وکٹ لی۔
قبل ازیں ٹاس جیت کر پہلے بیٹنگ کرتے ہوئے پاکستان نے مقررہ 20 اوورز میں 6 وکٹوں پر 201 رنز بنائے تھے۔
صاحبزادہ فرحان 41 گیندوں پر 74 بناکر نمایاں رہے۔ انہوں نے 6 شاندار چھکے اور 4 چوکے بھی لگائے۔
مزید پڑھیے: پاک بنگلہ دیش ٹی20 سیریز سے قبل قومی کھلاڑیوں کی پریکٹس
حسن نواز نے 26 گیندوں پر 51 رنز بنائے اور ناٹ آؤٹ رہے جبکہ محمد حارث نے 25 گیندوں پر 41 رنز اسکور کیا۔ صائم ایوب پہلے ٹی 20 کی طرح اس میچ میں بھی اچھے کھیل کا مظاہرہ نہ کرسکے اور صرف 4 رنز پر رن آؤٹ ہوگئے۔
بنگلہ دیش کی جانب سے حسن محمود اور تنظیم حسن ثاقب نے 2،2 وکٹیں حاصل کیں جبکہ رشاد حسین نے ایک کھلاڑی آؤٹ کیا۔
مین آف دی میچ
صاحبزادہ فرحان کے شاندار اسکور 74 رنز نے پاکستان کی جیت میں نمایاں کردار ادا کیا جس کے عوض انہیں مین آف دی میچ قرار دیا گیا۔
ان کے اسکور میں 6 چھکے اور 4 چوکے بھی شامل تھے۔
پاکستان ٹیم
سلمان علی آغا (کپتان)، صاحبزادہ فرحان، صائم ایوب ، محمد حارث ، حسن نواز، شاداب خان ، خوشدل شاہ ، فہیم اشرف ، حسن علی ، حارث رؤف اور ابراراحمد۔
بنگلہ دیش ٹیم
لٹن داس ( کپتان )، تنزید حسن، توحید ہریدوئے، پرویز حسین، ذاکر علی، شمیم حسین، مہدی حسن مرزا، رشاد حسین، تنظیم حسن ثاقب، حسن محمود، شریف الاسلام۔
