پاکستان میں زندگی گزارنے کے لیے درکار ضرورتوں اور سہولیات کی کمی ایک عام تاثر ہے۔ اس کے اسباب بیان کرنے والے کبھی قیادت کی کوتاہ بینی، ترجیحات نہ ہونے کا شکوہ کرتے ہیں تو کبھی کوئی دل جلا قیادت منتخب کرنے والوں کا اس کا ذمہ دار ٹھہرا جاتا ہے۔
پاکستانی ٹائم لائنز پر یہ قدیم بحث اس وقت تازہ ہوئی جب خیبرپختونخوا کی دو طالبات کی ویڈیو شیئر ہونا شروع ہوئی۔
مختلف ٹویپس کی شئیر کی گئی ویڈیو میں جہاں غم وغصہ کا اظہار کیا گیا وہیں صوبے میں حکمراں رہنے والوں کو بھی آڑے ہاتھوں لیا گیا۔
ویڈیو میں دکھایا گیا ہے کہ دو طالبات ایک نالے کو عبور کرنے کے لیے بہتے پانی میں رکھے گئے پتھروں پر پاؤں رکھ کر گزر رہی ہیں۔ ایسے میں آگے چلنے والی بچی توازن برقرار نہ رہنے کی وجہ سے گر پڑتی ہے۔
مزید پڑھیں
یہ اندازہ تو نہیں ہو سکا کہ بچی کو چوٹ لگی یا نہیں البتہ گرنے کے بعد بچی کھڑی ہوتی ہے تو آگے جانے کے بجائے واپس پلٹ آتی ہے۔ کیمرے کے قریب سے گزرتے ہوئے بچی کو روتے ہوئے واضح طور پر دیکھا جا سکتا ہے۔
پاکستانی ٹویپ صنم جمالی نے ویڈیو شیئر کرتے ہوئے اس میں دکھائی دینے والے پریشان کن مناظر کے مقام کی نشاندہی کی تو بتایا کہ یہ ضلع مالاکنڈ (خیبرپختونخوا) کی صورتحال ہے۔
صنم جمالی نے لکھا کہ ’ان معصوم بچوں کا تعلق خیبرپختونخوا کے ضلع مالاکنڈ کے علاقے بٹ خیلہ سے ہے۔ تعلیم حاصل کرنے کے لیے خوار ہو رہی ہیں۔ معصوم بچی گر کر روتے ہوئے واپس گھر کی طرف جارہی ہے۔ یہ ویڈیو حکام محکمہ تعلیم اور حکومت پاکستان کی منہ پر طمانچہ ہے۔‘
ان معصوم بچوں کا تعلق خیبرپختونخوا کے ضلع مالاکنڈ کے علاقے بٹ خیلہ سے ہے تعلیم حاصل کرنے کے لیے خؤار ہو رہی ہے، معصوم بچی گر کر روتے ہوئے وآپس گھر کے طرف جاتے ہیں یہ ویڈیو حکام تعلیم اور حکومت پاکستان کی منہ پر تمانچہ ہے. pic.twitter.com/NFGovqhx1s
— Sanam Jamali🇵🇰 (@sana_J2) May 4, 2023
پاکستان میں تعلیمی معیار کے اعتبار سے بہتر سمجھے جانے والے خیبرپختونخوا کے متعدد علاقے ایسے ہیں جہاں کے مکینوں کو تعلیم کی معیاری سہولیات اب بھی میسر نہیں ہیں۔
ویڈیو شیئر کرنے اور پر تبصرہ کرنے والے متعدد افراد نے پاکستان میں تعلیمی سہولیات کے ناکافی ہونے کا ذکر کیا۔
عالمی بینک کی رپورٹ کے مطابق پاکستان میں 2 کروڑ 30 لاکھ بچے تعلیم سے محروم ہیں
پسماندہ علاقوں کے وہ بچے جن کو پڑھنے لکھنے کا شوق ہے انہیں سکول تک رسائی سمیت کئی مشکلات کا سامنا ہے https://t.co/fYB6KtDUgV— Shakeel Ahmed Shakeel (@shakeel_ahmed9) May 4, 2023
متعدد ٹویپس نے خیبرپختونخوا میں مسلسل دو مرتبہ حکومت کرنے والی تحریک انصاف کو تنقید کا نشانہ بنایا تو موقف اپنایا کہ عمران خان اور ان کے ساتھی تقریروں میں تعلیم کی جو اہمیت بیان کرتے ہیں، عمل بھی ویسا کر لیں تو قوم کے نونہالوں کو بہتر آپشن مل جائیں گے۔