عوام سے موجودہ بحران کے دوران صبر و تحمل کا مظاہرہ کرنے کی اپیل کرتے ہوئے ایرانی صدر مسعود پزیشکیان نے واضح طور پر کہا ہے کہ جوہری ہتھیار کا حصول ایران کا مقصد نہیں ہے۔
ایک عوامی پیغام میں صدر مسعود پزیشکیان نے کہا کہ ہم اپنے عوام سے کہتے ہیں کہ وہ اس بحران کے دوران صبر کا دامن ہاتھ سے نہ چھوڑیں، ہم کسی پر تسلط قائم کرنا نہیں چاہتے اور نہ ہی ہم جارح قوم ہیں۔
Iranian President Masoud Pezeshkian:
"The enemy cannot eliminate us through killing and terrorism. The United States engages in bullying and violates international laws by allowing [Israel] to attack us. It is our right to benefit from nuclear energy, and no one has the right… pic.twitter.com/OF0VbWzNN7
— Quds News Network (@QudsNen) June 16, 2025
ایرانی صدر نے اسرائیل پر مسلم ممالک کو منظم انداز میں نشانہ بنانے کا الزام عائد کرتے ہوئے کہا کہ اسرائیل ایک ایک کر کے مسلم ریاستوں پر حملہ کر رہا ہے، انہوں نے امریکا کو بھی تنقید کا نشانہ بناتے ہوئے کہا کہ اسرائیلی حملوں کی اجازت دے کر امریکا دھونس اور غنڈہ گردی پر اُتر آیا ہے۔
ایرانی صدر مسعود پزیشکیان کا کہنا تھا کہ دشمن ہمیں قتل و دہشت گردی کے ذریعے ختم نہیں کر سکتا، امریکا دھونس دھمکی کا مظاہرہ کر رہا ہے اور اسرائیل کو ہم پر حملے کی اجازت دے کر بین الاقوامی قوانین کی خلاف ورزی کر رہا ہے۔
انہوں نے کہا کہ جوہری توانائی سے فائدہ اٹھانا ہمارا حق ہے، اور کوئی بھی ہمیں یہ حق چھیننے کا اختیار نہیں رکھتا، لیکن ہم جوہری ہتھیار حاصل کرنے کی کوشش نہیں کر رہے، یہ ایران کا ایک پختہ اور غیر متزلزل عقیدہ ہے۔
ایرانی صدر مسعود پزیشکیان کے ان بیانات کو خاص طور پر ایران کے جوہری پروگرام سے متعلق عالمی خدشات کے پس منظر میں خطے میں جاری کشیدگی کے تناظر میں اہم قرار دیا جا رہا ہے۔
