برطانوی وزیرِاعظم کیئر اسٹارمر نے اعلان کیا ہے کہ برطانیہ کی غیر ملکی انٹیلیجنس سروس یعنی ایم آئی6 کی سربراہی کے لیے بلیز میٹریویلی کا تقرر کیا گیا ہے۔ وہ برطانوی خفیہ ایجنسی کی 18ویں سربراہ ہونے کے ساتھ ساتھ اس عہدے پر فائز ہونے والی پہلی خاتون ہوں گی۔
یہ بھی پڑھیں: روس یوکرین جنگ بندی کے لیے برطانیہ اور فرانس کی تجویز کیا ہے؟
47 سالہ بلیز میٹریویلی 1999 سے ایم آئی6 کا حصہ ہیں اور اس وقت ٹیکنالوجی اور جدت سے متعلق شعبہ ’کیو سیکشن‘ کی سربراہی کر رہی ہیں، انہوں نے کیمبرج یونیورسٹی سے سوشیالوجی کی تعلیم حاصل کی، اور مشرق وسطیٰ اور یورپ میں خفیہ آپریشنز میں حصہ لیا ہے، وہ برطانیہ کی داخلی انٹیلیجنس ایجنسی ایم آئی5 میں بھی مختلف عہدوں پر کام کر چکی ہیں۔
I am delighted to announce that Blaise Metreweli will succeed me as Chief of #MI6 on 1 October 2025. Blaise has had a distinguished career as an intelligence officer and leader. She possesses all the qualities to be an outstanding ‘C’. Read more here 🔽https://t.co/w2HJ8cj1xs
— Richard Moore (@ChiefMI6) June 15, 2025
اپنی نامزدگی پر بلیز میٹریویلی کا کہنا تھا کہ انہیں اپنی سروس کی قیادت کا موقع ملنے پر فخر اور اعزاز محسوس ہو رہا ہے۔ ’ایم آئی5 اور جی سی ایچ کیو کے ساتھ مل کر ایم آئی6 برطانوی عوام کو محفوظ رکھنے اور ملک کے مفادات کو بیرونِ ملک فروغ دینے میں اہم کردار ادا کرتا ہے۔‘
برطانوی وزیر اعظم کیئر اسٹارمر نے کہا کہ یہ تقرری ایسے وقت میں ہوئی ہے جب برطانیہ کو بے مثال نوعیت کے خطرات مثلاً دشمن ممالک کی جاسوس کشتیوں کی موجودگی یا سائبر حملوں کا سامنا ہے۔
مزید پڑھیں: امریکی باشندے برطانوی شہریت کیوں حاصل کرنا چاہتے ہیں؟
سابق سربراہ سر رچرڈ مور، جنہوں نے 2020 میں عہدہ سنبھالا تھا، تقریباً 5 سالہ مدت مکمل کرنے کے بعد سبکدوش ہو رہے ہیں, وہ ایک سفارتکار کی حیثیت سے ترکیہ میں برطانیہ کے سفیر بھی رہ چکے ہیں۔
قابلِ ذکر بات یہ ہے کہ ایم آئی5 اور جی سی ایچ کیو کی قیادت پہلے بھی خواتین سنبھال چکی ہیں، مگر ایم آئی6 کی تاریخ میں یہ پہلا موقع ہے، اس تقرری کو بعض مبصرین نے ’زندگی میں فن کی عکاسی‘ قرار دیا ہے، جیسا کہ فلموں میں جیمز بانڈ کی باس یعنی ایم کا کردار، جسے طویل عرصے تک جوڈی ڈینچ نے نبھایا تھا۔
مزید پڑھیں:برطانوی وزیراعظم کیئر اسٹارمر نے صدر زیلنسکی کو گلے لگالیا، قرض کے معاہدے پر دستخط
بلیزمیٹریویلی کا موجودہ کردار ایم آئی6 کے کیو برانچ کی سربراہی ہے، وہی کیو جسے جیمز بانڈ فلموں میں نئی ٹیکنالوجی فراہم کرنے والے ماہر کے طور پر دکھایا جاتا ہے۔
