کراچی سے باجوڑ جانے والی مسافر بس حسن ابدال میں موٹروے غازی انٹرچینج کے قریب الٹ گئی، جس کے نتیجے میں ایک خاتون جاں بحق جبکہ 25 افراد زخمی ہو گئے۔
ریسکیو ترجمان کے مطابق حادثے کے فوراً بعد امدادی کارروائیاں شروع کردی گئیں۔ زخمیوں کو ابتدائی طبی امداد کے بعد ٹی ایچ کیو اسپتال حسن ابدال منتقل کیا گیا، جبکہ جاں بحق خاتون کی لاش کو حضرو اسپتال بھیجا گیا۔
ٹی ایچ کیو اسپتال حسن ابدال کے ڈاکٹر جنید نے وی نیوز سے گفتگو میں بتایا کہ 10 زخمیوں کو اسپتال لایا گیا ہے۔ زخمیوں میں 7 سالہ علشبہ، 4 سالہ مریم، صائمہ، زونیشہ اور اریشہ شامل ہیں۔
انہوں نے بتایا کہ دیگر زخمیوں میں فیاض، عثمان علی، بلخدا، نصر اللہ اور وحید شامل ہیں۔ ریسکیو حکام کے مطابق 14 زخمیوں کو موقع پر ہی طبی امداد فراہم کی گئی تھی۔
ترجمان ریسکیو کا کہنا ہے کہ حادثے کی ممکنہ وجہ بارش کے دوران تیز رفتاری اور سڑک پر پھسلن ہے۔
