عالمی یوم حمایت متاثرینِ تشدد کے موقع پر پاکستان نے دنیا بھر میں تشدد کا شکار افراد سے یکجہتی کا اظہار کرتے ہوئے انسانی وقار کے تحفظ اور تشدد کے خاتمے کے عزم کا اعادہ کیا ہے۔
دفتر خارجہ کی جانب سے جاری کردہ ایک بیان میں کہا گیا کہ اسلام ہر انسان کی حرمت اور وقار کو مقدم رکھتا ہے اور تشدد یا غیر انسانی و توہین آمیز سلوک اسلامی تعلیمات میں عدل، رحم اور ہمدردی کے بنیادی اصولوں کے منافی ہے۔
یہ بھی پڑھیں:بھارت بیرون ملک قتل و غارت، مداخلت اور غیر ملکی علاقوں پر قابض ہے، ترجمان دفتر خارجہ
پاکستان نے اس موقع پر واضح کیا کہ وہ نہ صرف اسلامی اقدار بلکہ اپنی بین الاقوامی ذمہ داریوں کے تحت بھی تشدد کے خاتمے اور تمام افراد کے تحفظ کے لیے پرعزم ہے۔
’اس مقصد کے لیے پاکستان میں قانونی اصلاحات، ادارہ جاتی تحفظات اور نگرانی کے نظام کو مضبوط کیا جا رہا ہے، جب کہ متاثرین کو طبی، قانونی اور نفسیاتی مدد فراہم کرنے کے لیے اقدامات جاری ہیں۔‘
مزید پڑھیں:فلسطین پر مؤقف دوٹوک، حکومت نے پاکستانی صحافیوں کے دورہ اسرائیل کی رپورٹس کا نوٹس لے لیا، دفتر خارجہ
ترجمان دفتر خارجہ نے دنیا بھر میں بالخصوص مقبوضہ فلسطینی علاقوں اور بھارت کے زیر قبضہ جموں و کشمیر میں ریاستی تشدد اور غیر انسانی سلوک پر شدید تشویش کا اظہار کرتے ہوئے کہا کہ قابض طاقتیں کشمیریوں اور فلسطینیوں کے حق خود ارادیت کو دبانے کے لیے بدترین تشدد اور اذیت ناک سلوک روا رکھے ہوئے ہیں۔
پاکستان نے عالمی برادری سے مطالبہ کیا کہ وہ ان قابض قوتوں کے مظالم کی مذمت کرے، ان کا احتساب کرے اور متاثرین کی داد رسی کے لیے عملی اقدامات کرے۔
