وفاقی بورڈ آف ریونیو (ایف بی آر) نے نئے مالی سال کے آغاز پر ملکی صنعت کو ریلیف فراہم کرنے کے لیے 7 ہزار سے زائد اشیا پر ٹیکس اور ڈیوٹی میں کمی کا نوٹیفکیشن جاری کر دیا ہے۔ یہ اقدام خام مال اور ان سے متعلقہ مصنوعات پر لاگت کم کرنے، مہنگائی پر قابو پانے اور معیشت کو فعال بنانے کی کوششوں کا حصہ ہے۔
یہ بھی پڑھیں: وفاقی ٹیکس محصولات میں 42 فیصد تاریخی اضافہ، وزیراعظم کی ایف بی آر کو ڈیجیٹائزیشن میں تیزی لانے کی ہدایت
ایف بی آر کے مطابق جن اشیا پر ڈیوٹی اور ٹیکس میں کمی کی گئی ہے، ان میں پولٹری انڈسٹری کے لیے بریڈنگ مرغ، فروزن مچھلی، زندہ مچھلی، کواڈ فش، دودھ، ملک پاؤڈر، دہی، پان، صابن اور کاسمیٹکس سمیت کئی اہم اشیا شامل ہیں۔
Salient Feature by Muhammad Nisar Khan Soduzai on Scribd
بریڈنگ مرغ کی امپورٹ ڈیوٹی 5 فیصد کردی گئی ہے، جبکہ فروزن مچھلی پر ریگولیٹری ڈیوٹی 17.5 فیصد، زندہ مچھلی اور کواڈ فش پر 5 فیصد کردی گئی ہے۔ امپورٹڈ دودھ، ملک پاؤڈر اور دہی پر ڈیوٹی اب 20 فیصد ہ گی، جبکہ پان پر ریگولیٹری ڈیوٹی 400 روپے فی کلو مقرر کی گئی ہے۔
یہ بھی پڑھیں: چیئرمین ایف بی آر نے نئے مالی سال کو ٹیکس دہندگان کے لیے سہولتیں دینے کا سال قرار دیدیا
نوٹیفکیشن میں واضح کیا گیا ہے کہ ریگولیٹری ڈیوٹی کی زیادہ سے زیادہ شرح 90 فیصد سے کم کر کے 50 فیصد کردی گئی ہے، اور اضافی کسٹمز ڈیوٹی کی مختلف شرحوں میں کمی کی گئی ہے۔ اس اصلاحاتی عمل کا مقصد آئندہ 5 سال میں اوسط کسٹمز ٹیرف کو 19 فیصد سے کم کر کے 9.5 فیصد تک لانا ہے۔
یہ اقدامات صنعتی خام مال کی درآمد کو سستا بنانے اور مقامی پیداواری لاگت میں کمی لانے کی حکومتی حکمت عملی کا حصہ ہیں تاکہ برآمدات میں اضافہ کیا جا سکے اور معیشت کو مزید مستحکم بنایا جا سکے۔
