ویسٹ انڈیز کے لیجنڈری بیٹر برائن لارا نے اپنی شاندار کرکٹنگ کیریئر کے دوران سب سے خطرناک اور ذہنی طور پر مضبوط بولر آسٹریلوی اسپنر شین وارن کو قرار دیا ہے۔
کرکٹ شو ’اسٹک ٹو کرکٹ‘ میں سابق انگلش کپتان سر ایلسٹر کک، مائیکل وان اور فل ٹفنیل کے ساتھ گفتگو کرتے ہوئے برائن لارا نے شین وارن اور سری لنکن آف اسپنر متھیا مرلی دھرن دونوں کو عظیم بولرز قرار دیا، لیکن جب اُن سے پوچھا گیا کہ کیا وارن ان کے کیریئر کے سب سے بہترین بولر تھے؟ تو انہوں نے فوراً کہا کہ وہی سب سے بہترین تھے۔
لارا نے کہا کہ مرلی کے خلاف جب میں بیٹنگ کے لیے جاتا تو شروع کے 30 منٹ بالکل الجھاؤ کا شکار ہوتا، اس نے مجھ پر زیادہ دباؤ ڈالا۔ لیکن وارن کے خلاف میں بظاہر پراعتماد لگتا، گیندیں بلے کے درمیان سے لگتیں، پھر دن کے کسی مرحلے پر، خاص طور پر دوپہر 2 یا 3 بجے، وہ اچانک ایک جادوئی اسپیل یا گیند پھینکتا، اور اسی وجہ سے میں اُسے زیادہ عظیم مانتا ہوں۔
مزید پڑھیں: گریٹ برائن لارا نے پاکستان کے کس کھلاڑی کو خطرناک ترین بولر قرار دیا؟
برائن لارا کا کہنا تھا کہ شین وارن نے نہ صرف ذہنی طور پر مضبوطی دکھائی بلکہ اُن پچز پر بھی وکٹیں لیں جو تیز گیند بازوں کے لیے زیادہ سازگار تھیں، جیسے گلین میک گرا اور دیگر کے لیے۔
واضح رہے کہ شین وارن نے 1992 سے 2007 کے دوران آسٹریلیا کی جانب سے 145 ٹیسٹ میچز میں 708 وکٹیں حاصل کیں اور تاریخ کے کامیاب ترین اسپنرز میں شمار ہوتے ہیں۔ ریٹائرمنٹ کے بعد وہ کرکٹ کمنٹری اور دیگر شعبوں میں بھی متحرک رہے، تاہم 2022 میں دل کا دورہ پڑنے سے صرف 52 برس کی عمر میں انتقال کر گئے۔
جب سابق انگلش کرکٹر ڈیوڈ لائیڈ نے لارا سے پوچھا کہ کیا اُن کا وارن کے ساتھ اچھا تعلق تھا؟ تو لارا نے مسکرا کر کہا کہ یقیناً ہم نے ایک ساتھ بہت اچھا وقت گزارا۔
برائن لارا نے اپنے ٹیسٹ کیریئر میں 11,953 رنز بنائے، اور 2004 میں انگلینڈ کے خلاف اینٹیگا میں 400 رنز کی ناقابل شکست اننگز کھیل کر آج بھی ایک انفرادی اننگز میں سب سے زیادہ رنز بنانے کا عالمی ریکارڈ رکھتے ہیں۔ حال ہی میں جنوبی افریقہ کے کپتان ویان ملر نے زمبابوے کے خلاف 367 رنز پر اننگز ڈکلیئر کرکے یہ ریکارڈ برقرار رہنے دیا۔
