سعودی عرب کے دارالحکومت ریاض میں جڑواں بچیوں یارا اور لارا کی کامیاب علیحدگی کی سرجری کی گئی۔ یہ آپریشن کنگ عبدالعزیز میڈیکل سٹی میں ہوا، جس کی نگرانی کنگ سلمان ہیومینیٹرین ایڈ اینڈ ریلیف سینٹر (KSrelief) کے جنرل سپروائزر اور سعودی جڑواں بچوں کی علیحدگی کے پروگرام کے سربراہ ڈاکٹر عبداللہ الربیعہ نے کی۔
سعودی پریس ایجنسی کے مطابق ڈاکٹر الربیعہ نے کامیاب آپریشن پر پوری میڈیکل ٹیم کی جانب سے خادم حرمین شریفین شاہ سلمان بن عبدالعزیز اور ولی عہد و وزیراعظم شہزادہ محمد بن سلمان کا شکریہ ادا کیا، جن کی مسلسل سرپرستی اور حمایت کی بدولت یہ پروگرام دنیا بھر میں انسانیت کی خدمت کا ایک روشن نشان بن چکا ہے۔
انہوں نے کہا کہ اس طبی معاونت نے سعودی میڈیکل ٹیم کو اعلیٰ ترین طبی خدمات فراہم کرنے کے قابل بنایا، جس سے بچوں اور ان کے خاندانوں کی زندگیوں کے معیار میں بہتری آئی ہے، اور مملکت کی عالمی طبی و انسانی خدمات میں پوزیشن مزید مستحکم ہوئی ہے۔
مزید پڑھیں: تین جوڑی جڑواں بھائی حجاج کی خدمت میں سرگرم، منفرد ریکارڈ قائم
ڈاکٹر الربیعہ نے بتایا کہ یہ پیچیدہ آپریشن نو مراحل پر مشتمل تھا، جس میں 38 ماہرین نے حصہ لیا، جن میں بچوں کے سرجنز، اینستھیزیا ماہرین، یورولوجسٹ، پلاسٹک سرجنز، آرتھوپیڈکس، نرسنگ اور ٹیکنیکل عملہ شامل تھا۔ علیحدگی کی یہ کارروائی وزارت نیشنل گارڈ کے تحت کنگ عبداللہ اسپیشلسٹ چلڈرن اسپتال میں انجام دی گئی۔
یارا اور لارا پیدائشی طور پر پیٹ کے نچلے حصے، شرمگاہ، بڑی آنت کے آخری حصے، مثانے اور تولیدی نظام میں جُڑے ہوئے تھیں، اور ان کے کولہے کی ہڈی بھی جزوی طور پر منسلک تھی۔ دونوں کے ہاتھ پاؤں علیحدہ اور فعال تھے۔ ان کی پیدائش 5 نومبر 2024 کو ہوئی تھی اور ان کا مجموعی وزن 10 کلوگرام تھا۔
تفصیلی معائنے اور ماہرین کی مشاورت کے بعد علیحدگی کو ممکن قرار دیا گیا۔ ڈاکٹر الربیعہ نے بتایا کہ یہ پروگرام 35 سال کے دوران 27 ممالک سے 150 کیسز کا جائزہ لے چکا ہے، جن میں سے 65 بچوں کو کامیابی سے علیحدہ کیا گیا ہے۔ یارا اور لارا کی علیحدگی 65واں کامیاب آپریشن ہے، جبکہ اب تک 45 سعودی جڑواں بچوں کا معائنہ کیا گیا ہے، جن میں سے 16 کی علیحدگی کامیابی سے مکمل ہو چکی ہے۔
