اسپیکر قومی اسمبلی ایاز صادق نے پیر کے روز ایوان کی کارروائی کے دوران تحریک انصاف کے رکن قومی اسمبلی شیخ وقاص اکرم کی مسلسل غیر حاضری پر آئینی وضاحت دیتے ہوئے کہا ہے کہ اگر کوئی رکن 40 دن تک مسلسل اجلاسوں سے غیر حاضر رہے تو اس کی نشست خالی قرار دینے کی تحریک پیش کی جا سکتی ہے۔
یہ بھی پڑھیں:پی ٹی آئی نے 26ویں آئینی ترمیم کے حق میں ووٹ دینے والے 5 اراکین قومی اسمبلی کو پارٹی سے نکال دیا
اسپیکر ایاز صادق نے اجلاس کے دوران رولنگ دیتے ہوئے کہا کہ وہ بطور اسپیکر، آئین اور قواعد کے مطابق ایوان کو آگاہ کر رہے ہیں کہ رول 44 (1) کے تحت شیخ وقاص اکرم اسمبلی سیشن کے 40 دنوں سے بغیر کسی رخصت لیے مسلسل غیر حاضر ہیں، تحریک پیش ہونے اور منظور ہونے کی صورت میں ان کی نشست خالی قرار دی جا سکتی ہے۔
شیخ وقاص اکرم چالیس دن سے قومی اسمبلی سے غائب ہیں۔سیٹ خالی ہوسکتی ہے
سپیکر قومی اسمبلی نے خطرے کی گھنٹی بجا دی ۔ pic.twitter.com/ldkE5BisG3— tariq mahmood ch (@tariqchaaj) August 5, 2025
اس موقع پر پی ٹی آئی کے رکن ملک عامر ڈوگر نے اعتراض اٹھاتے ہوئے کہا کہ یہ جو رول آپ پڑھ رہے ہیں، بتائیں کہ اب تک ایوان میں کب قواعد پر مکمل عملدرآمد ہوا، ہمارے اراکین کو پارلیمنٹ ہاؤس سے گرفتار کیا گیا، انہیں جیلوں میں ڈالا جا رہا ہے، یہ سب ظلم ہوتا رہا ہے۔
جس پر اسپیکر ایاز صادق نے جواب دیا کہ ہم نے متعدد بار پروڈکشن آرڈر جاری کیے ہیں، ملک عامر ڈوگر نے اسے پی ٹی آئی کا آئینی حق قرار دیتے ہوئے کہا کہ یہ ہمارا حق ہے، جواباً اسپیکر ایاز صادق نے استفسار کیا کہ یہ حق 2018 سے 2022 کے درمیان کہاں تھا۔
مزید پڑھیں:جیلوں سے رہا ہونے والے کئی کارکنان وفات پاگئے، جوڈیشل انکوائری ہونی چاہیے، شیخ وقاص اکرم
اس پر بحث مزید شدت اختیار کر گئی، جس پر پی ٹی آئی رکن ملک عامر ڈوگر نے کہا کہ اگر یہی ماحول برقرار رکھنا ہے تو پارلیمنٹ کو تالا لگا دیں، ایوان میں اس موقع پر کشیدگی دیکھی گئی، تاہم اسپیکر نے اجلاس کی کارروائی کو قواعد و ضوابط کے مطابق آگے بڑھانے پر زور دیا۔
بعدازاں قومی اسمبلی میں پاکستان مسلم لیگ (ن) کی رکن نوشین افتخار نے شیخ وقاص اکرم کی رکنیت ختم کرنے کی تحریک پیش کرتے ہوئے کہا کہ شیخ وقاص اکرم گزشتہ 40 دنوں سے ایوان کے اجلاسوں میں شریک نہیں ہوئے، لہٰذا آئین کے آرٹیکل 64 کے تحت ان کی قومی اسمبلی کی رکنیت ختم کی جائے۔
اس سے قبل وزیر برائے پارلیمانی امور طارق فضل چوہدری کا کہنا تھا کہ ماضی میں میاں محمد سومرو کی نشست بھی مسلسل 40 دن غیر حاضر رہنے کی بنیاد پر خالی قرار دی جا چکی ہے، ڈپٹی اسپیکر نے شیخ وقاص اکرم کی رکنیت کے خاتمے سے متعلق تحریک پر کارروائی کے لیے متعلقہ قواعد کے مطابق اقدامات کرنے کی ہدایت جاری کر دی۔
