پاکستان اسٹاک ایکسچینج میں سرمایہ کاروں کے مسلسل اعتماد اور خریداری کے رجحان کے باعث منگل کو کاروبار کے دوران کے ایس ای 100 انڈیکس 1,43,000 کی نئی سطح عبور کرگیا۔
منگل کی صبح 11 بج کر 55 منٹ پر کے ایس ای 100 انڈیکس 1,200.51 پوائنٹس کے اضافے کے ساتھ 1,43,253.15 پر ٹریڈ کر رہا تھا، جو 0.85 فیصد کے نمایاں اضافے کا مظہر ہے۔
سرمایہ کاری کے لحاظ سے نمایاں شعبے جیسے کہ آٹوموبائل، کمرشل بینکس، سیمنٹ، فرٹیلائزر اور آئل مارکیٹنگ کمپنیاں (OMCs) سبز نشان میں ٹریڈ کرتے رہے۔ اہم کمپنیوں جیسے ایس این جی پی ایل، وافی، ایم سی بی، ایم بی ای ایل اور یو بی ایل میں نمایاں بہتری دیکھی گئی۔
یہ بھی پڑھیں:امریکا سے تجارتی معاہدہ، پاکستان اسٹاک مارکیٹ نئی بلند ترین سطح پر پہنچ گئی
پیر کے روز بھی مارکیٹ میں تیزی کا رجحان غالب رہا، اور کے ایس ای 100 انڈیکس 1,017 پوائنٹس یعنی 0.72 فیصد اضافے کے ساتھ 1,42,052.65 پر بند ہوا، جو کہ ایک نئی تاریخی سطح تھی۔
ماہرین کے مطابق مارکیٹ میں تیزی کی وجہ بڑی کمپنیوں کی مضبوط کارکردگی، مختلف شعبہ جات سے متوقع اچھے منافع، اور سرمایہ کاروں کی مثبت توقعات ہیں۔
عالمی مارکیٹ کا پس منظر
دوسری جانب ایشیائی مارکیٹوں میں بھی منگل کو مسلسل دوسرے روز تیزی دیکھی گئی، جبکہ امریکی ڈالر نے اپنی پچھلی گراوٹ کے رجحان کو برقرار رکھا، سرمایہ کاروں میں اس بات کا رجحان بڑھا ہے کہ فیڈرل ریزرو عالمی معیشت کو سہارا دینے کے لیے ستمبر میں شرح سود میں کمی کر سکتا ہے۔
پیر کو امریکی شیئرز بھی مثبت آمدنی رپورٹس اور ملازمتوں کے کمزور اعداد و شمار کے بعد شرح سود میں کمی کی توقعات پر بہتر کارکردگی کے ساتھ بند ہوئے۔
تیل کی قیمتوں میں کمی دیکھی گئی ہے، جس کی بڑی وجہ اوپیک پلس کی جانب سے پیداوار میں اضافہ اور امریکی صدر ڈونلڈ ٹرمپ کی جانب سے بھارت پر روسی تیل کی خریداری پر محصولات بڑھانے کی دھمکی ہے۔
مزید پڑھیں:پاکستان اسٹاک ایکسچینج نئی بلندیوں پر، تیزی کا طوفان مسلسل جاری
جاپان کی نِکئی مارکیٹ میں بھی بہتری دیکھی گئی، جہاں جولائی میں سروس سیکٹر کی سرگرمیوں میں نمایاں اضافہ ریکارڈ کیا گیا، ایم ایس سی آئی کا ایشیا پیسفک انڈیکس، جاپان کے علاوہ، 0.6 فیصد اضافہ ظاہر کر رہا ہے، جبکہ نِکئی انڈیکس میں بھی 0.5 فیصد بہتری آئی۔
سی ایم ای فیڈ واچ کے مطابق ستمبر میں شرح سود میں کمی کے امکانات اب تقریباً 94 فیصد ہو چکے ہیں، جو کہ 28 جولائی کو63 فیصد تھے۔
