ویڈیو شیئرنگ پلیٹ فارم یوٹیوب نے اعلان کیا ہے کہ وہ 13 اگست سے مصنوعی ذہانت (AI) اور مشین لرننگ (ML) پر مبنی نیا ایج ایسٹیمیشن ماڈل متعارف کرائے گا، جس کا مقصد کم عمر صارفین کو محفوظ بنانا اور ان اکاؤنٹس کی نشاندہی کرنا ہے جن میں غلط عمر درج کی گئی ہو۔
یہ بھی پڑھیں: یوٹیوب شارٹس سے پاکستان میں بھی پیسے کمانے کا آغاز
یہ ماڈل جدید ٹیکنالوجی سگنلز اور الگورتھمز کی مدد سے صارف کی حقیقی عمر کا تعین کرے گا۔ کمپنی کے مطابق یہ فیچر درج ذیل ذرائع سے ڈیٹا لے کر کام کرے گا.
سرچ ہسٹری: صارف یوٹیوب پر کن موضوعات کی تلاش کرتا ہے۔
ویڈیوز کے زمرے: کس قسم کی ویڈیوز دیکھی جاتی ہیں۔
اکاؤنٹ کی مدت: اکاؤنٹ کب سے فعال ہے اور اس پر کس نوعیت کی سرگرمیاں ہو رہی ہیں۔
ممکنہ اقدامات
اگر ماڈل کسی اکاؤنٹ کو 18 سال سے کم عمر قرار دے تو یوٹیوب فوری طور پر ذاتی نوعیت کے اشتہارات بند کرے گا، ویڈیو ریکمنڈیشنز میں اضافی حفاظتی فلٹر شامل کرے گا اور مخصوص اقسام کے مواد کو بار بار دیکھنے کی حد مقرر کرے گا۔
یہ بھی پڑھیں: گزشتہ 5 ماہ میں 62 ہزار سے زائد یوٹیوب چینلز اور لنکس کو بلاک کیا، پی ٹی اے
مزید یہ کہ ڈیجیٹل ویل بینگ ٹولز کو فعال کرے گا تاکہ نوجوان صارفین کا اسکرین ٹائم کم کیا جاسکے۔
غلطی سے کم عمر قرار پانے کی صورت
اگر کسی بالغ صارف کا اکاؤنٹ غلطی سے کم عمر قرار دیا گیا تو وہ اپنی عمر کی تصدیق سرکاری شناختی کارڈ، کریڈٹ کارڈ یا سیلفی کے ذریعے کرسکے گا۔
یاد رہے کہ یوٹیوب کا یہ فیچر ابتدائی طور پر صرف امریکا میں لانچ کیا جا رہا ہے۔
