خیبرپختونخوا حکومت نے سیلاب متاثرین کے نقصانات کے بروقت ازالے کے لیے جدید ڈیجیٹل پیمنٹ سسٹم متعارف کرا دیا ہے۔ وزیر اعلیٰ خیبرپختونخوا علی امین گنڈاپور نے ‘ڈیجیٹل ڈیزاسٹر کمپنسیشن مینجمنٹ’ ایپ کا باضابطہ افتتاح کیا۔
یہ ایپ خیبرپختونخوا آئی ٹی بورڈ نے ہنگامی بنیادوں پر تیار کی ہے اور اسے صوبائی حکومت کی مرکزی سروس ڈیلیوری ایپ “دستک” سے منسلک کر دیا گیا ہے۔ اس کے ذریعے متاثرین اپنی املاک کے نقصانات کی تفصیلات اپ لوڈ کر کے معاوضے کا کلیم کر سکیں گے، جبکہ ادائیگیاں براہ راست آن لائن متاثرین کے اکاؤنٹس میں منتقل ہوں گی۔
یہ بھی پڑھیے: بلوچستان حکومت نے گلگت بلتستان اور خیبر پختونخوا کے سیلاب متاثرین کے لیے امدادی سامان روانہ کردیا
بریفنگ کے دوران بتایا گیا کہ ایپ مکمل طور پر شفاف اور خودکار میکنزم پر مشتمل ہے۔ جیو ٹیگنگ اور خودکار ویری فکیشن کی بدولت غلط معلومات یا جعلی کلیمز کی گنجائش نہیں ہوگی۔ اس کے علاوہ وزیر اعلیٰ، چیف سیکرٹری اور متعلقہ حکام کے لیے خصوصی ڈیش بورڈ پر تمام ادائیگیوں اور نقصانات کی تفصیلات دستیاب ہوں گی۔
وزیر اعلیٰ علی امین گنڈاپور نے اس اقدام کو سیلاب متاثرین کے لیے بروقت اور شفاف معاوضہ ادائیگی کی جانب ایک انقلابی قدم قرار دیا۔ انہوں نے مختصر وقت میں ایپ تیار کرنے پر متعلقہ حکام کو خراجِ تحسین پیش کرتے ہوئے کہا کہ متاثرین کو سہولیات کی فوری فراہمی صوبائی حکومت کی پہلی ترجیح ہے۔
