بلوچستان کو ترقی کی دوڑ میں دوسرے صوبوں کے برابر لانے کا فیصلہ کرلیا، وزیراعظم شہباز شریف

وزیراعظم پاکستان شہباز شریف نے کہا ہے کہ بلوچستان کو ترقی کی دوڑ میں دوسرے صوبوں کے برابر لانے کا فیصلہ کرلیا ہے۔

پاکستانی طلبہ کو زرعی شعبے میں تربیت کے لیے چین روانہ کرنے کی تقریب سے خطاب کرتے ہوئے انہوں نے کہاکہ طلبا کا انتخاب میرٹ پر کیا گیا ہے۔ اس میں بلوچستان کا کوٹہ زیادہ رکھا گیا ہے، جبکہ لیپ ٹاپ اسکیم میں بھی زیادہ حصہ دیا جائےگا۔

یہ بھی پڑھیں: بلوچستان کی ترقی اور فلاح و بہبود حکومت کی اولین ترجیح ہے، وزیراعظم شہباز شریف

وزیراعظم نے کہا کہ زرعی شعبہ ملکی معیشت کی ترقی میں ریڑھ کی ہڈی کی حیثیت رکھتا ہے اور جدید ٹیکنالوجی کے استعمال کے بغیر ترقی ممکن نہیں۔

انہوں نے بتایا کہ 300 طلبہ کا پہلا بیج چین سے ٹریننگ مکمل کرکے واپس آ چکا ہے، جبکہ مزید طلبہ بھی میرٹ کی بنیاد پر تربیت کے لیے چین بھیجے جا رہے ہیں۔ اور کچھ پہلے سے وہاں پر موجود ہیں۔

وزیراعظم نے کہاکہ چین ہمارا آزمودہ اور بااعتماد دوست ہے جو ہر مشکل وقت میں پاکستان کے ساتھ کھڑا رہا۔ زرعی شعبے میں چین کے تجربات سے بھرپور استفادہ کیا جائے گا تاکہ جدید ٹیکنالوجی پاکستان منتقل ہوسکے۔

’چین جانے والے طلبہ پاکستان کے سفیر ہیں‘

ان کے مطابق چین جانے والے طلبہ پاکستان کے سفیر ہیں اور وہ اپنی محنت اور علم سے ملک کو مشکلات سے نکالنے میں کردار ادا کریں گے۔

وزیراعظم نے کہا کہ بلوچستان کے طلبہ کے لیے چین میں ٹریننگ کا کوٹہ ان کی آبادی کے تناسب سے 10 فیصد زیادہ رکھا گیا ہے۔ اسی طرح لیپ ٹاپ اسکیم میں بھی بلوچستان کے لیے اضافی کوٹہ مختص کیا جائے گا تاکہ وہاں کے نوجوانوں کو تعلیم اور تحقیق میں سہولت ملے۔ پاکستان کی ترقی کی اصل کنجی نوجوانوں کے ہاتھ میں ہے۔

انہوں نے کہاکہ ہم محنت کرکے وہ مقام حاصل کریں گے جہاں قرضے نہ لینا پڑیں بلکہ اپنے وسائل کا استعمال کرکے ملک کو ترقی دی جائے۔

وزیراعظم نے واضح کیا کہ اب پاکستان میں صرف میرٹ، امانت اور دیانت کا سکہ رائج ہوگا، اور شفافیت پر مبنی پالیسیوں کے ذریعے ملک کو ترقی کی راہ پر گامزن کیا جائے گا۔

زراعت کی ترقی کے لیے ہنرمند افراد انتہائی اہم ہیں، چینی سفیر