امریکی فیڈرل ایوی ایشن اتھارٹی (FAA) کا اعلیٰ سطحی وفد آج پاکستان سول ایوی ایشن اتھارٹی (PCAA) ہیڈکوارٹرز کراچی میں اپنے باضابطہ اجلاس کے ساتھ مصروفیات کا آغاز کر گیا۔
امریکی وفد میں ایف اے اے کے 5 سینئر عہدیداران کے ساتھ امریکی سفارتخانے کے 2 نمائندے بھی شامل ہیں۔ اجلاس کی صدارت ڈائریکٹر جنرل سول ایوی ایشن اتھارٹی ندیر شفیع ڈار نے کی اور وفد کو تنظیم کے ڈھانچے، مینڈیٹ اور آپریشنل امور پر تفصیلی بریفنگ دی۔
ترجمان کے مطابق ایف اے اے ٹیم پورے ہفتے پی سی اے اے کے متعلقہ محکموں اور افسران سے تفصیلی ملاقاتیں کرے گی۔
یہ بھی پڑھیے: کراچی میں جرمن قونصل خانہ غیر یورپی شہریوں کے لیے کیوں بند ہوا؟
اس دوران وہ ریگولیٹری اور آپریشنل دستاویزات کی جانچ، موجودہ نظام کا جائزہ، متعلقہ عملے کے انٹرویوز، اور قانونی و ریگولیٹری فریم ورک پر مشاورت کریں گے تاکہ انہیں عالمی معیار کے مطابق پرکھا جا سکے۔
یہ مشاورتی اور جائزہ اجلاس جمعے تک جاری رہیں گے، جس کے بعد ایف اے اے وفد امریکہ روانہ ہوگا۔ وفد اپنی مشاورت اور جائزے کی روشنی میں ایک جامع رپورٹ تیار کرے گا جو بعد ازاں متعلقہ حکام کو جمع کرائی جائے گی۔
