فرانس میں ملک گیر احتجاجی تحریک ’بلاک ایوری تھنگ‘ کے تحت ہزاروں مظاہرین سڑکوں، ریلوے ٹریکس اور گیس اسٹیشنز پر جمع ہو گئے، جس سے معمولاتِ زندگی بری طرح متاثر ہوئے۔ پولیس نے آنسو گیس کا استعمال کیا اور سینکڑوں مظاہرین کو گرفتار کرلیا۔
حکام کے مطابق صورتحال پر قابو پانے کے لیے 80 ہزار سے زائد پولیس اور نیم فوجی اہلکار تعینات کیے گئے، جو 2018 کی یلو ویسٹس تحریک کے بعد سب سے بڑا سیکیورٹی آپریشن قرار دیا جا رہا ہے۔
یہ تحریک موسم گرما میں دائیں بازو کے حلقوں سے شروع ہوئی تھی مگر بعدازاں بائیں بازو، مزدور یونینوں اور طلبہ تنظیموں نے بھی اس میں شمولیت اختیار کر لی۔
مزید پڑھیں: فرانسیسی حکومت کا انہدام: وزیرِاعظم فرانسوا بایرو عدم اعتماد کے بعد عہدے سے فارغ
مظاہروں میں شدت اُس وقت آئی جب صدر ایمانوئل میکرون کی حکومت مجوزہ بجٹ کٹوتیوں کے خلاف قومی اسمبلی میں عدم اعتماد کے ووٹ سے تحلیل ہو گئی۔
سابق وزیراعظم فرانسوا بیرو نے 50 ارب ڈالر سے زائد کی بچت کے لیے قومی تعطیلات ختم کرنے، 2026 کے لیے پنشن منجمد کرنے اور صحت کے بجٹ میں بھاری کمی کی تجاویز پیش کی تھیں جس پر عوامی غصہ پھوٹ پڑا۔
پیرس، لیون، مارسیل اور تولوز سمیت بڑے شہروں میں سڑکوں پر رکاوٹیں کھڑی کی گئیں، ایمیزون کے ڈپو کا راستہ بھی بند کیا گیا جبکہ رین شہر میں ایک بس کو آگ لگا دی گئی۔
مزید پڑھیں: برطانیہ، فرانس اور جرمنی نے ایران پر پابندیوں کے لیے سلامتی کونسل کو خط لکھ دیا
وزارت داخلہ نے تصدیق کی ہے کہ ملک بھر میں 7 سو سے زائد مقامات پر رکاوٹیں کھڑی کی گئیں۔ رین اور دیگر شہروں میں بجلی کی تاریں جلنے سے ٹرین سروس معطل ہو گئی۔
دارالحکومت پیرس میں گیئر ڈو نورڈ اسٹیشن سمیت مختلف داخلی راستوں پر مظاہرین نے دھرنا دیا۔ ہائی اسکول کے طلبہ نے بھی احتجاج میں حصہ لیا جس پر پولیس کے ساتھ تصادم ہوا۔
عینی شاہدین کے مطابق پولیس نے عمارت کا دروازہ زبردستی کھول کر طلبہ کو اندر جانے پر مجبور کیا اور آنسو گیس استعمال کی۔ مظاہرین صدر میکرون کے خلاف نعرے لگا رہے ہیں اور ان کے فوری استعفے کا مطالبہ کر رہے ہیں۔
مزید پڑھیں: فرانس کے فلسطینی ریاست کو تسلیم کرنے کے اعلان کا سعودی عرب کی جانب سے خیرمقدم
میکرون نے 2 روز قبل اپنا پانچواں وزیراعظم مقرر کرتے ہوئے قریبی ساتھی سباستیان لکورنیو کو حکومت بنانے کا اختیار دیا ہے۔ لکورنیو نے اعلان کیا ہے کہ وہ بڑی سیاسی جماعتوں سے مشاورت کریں گے اور اصلاحات کے لیے اقدامات اٹھائیں گے۔
