قومی کرکٹ ٹیم کے فاسٹ بولر شاہین شاہ آفریدی نے کہا ہے کہ پاکستان ایشیا کپ کے فائنل میں جگہ بنائے گا اور اگر روایتی حریف بھارت سے دوبارہ مقابلہ ہوا تو سبز ہلالی پرچم لہرا کر جیت اپنے نام کریں گے۔
یہ بھی پڑھیں: شاہین شاہ آفریدی نے ون ڈے کرکٹ میں نیا عالمی ریکارڈ اپنے نام کرلیا
ایشیا کپ 1984 میں شروع ہوا تھا اور یہ اس کا 17واں ایڈیشن ہے، تاہم پاکستان اور بھارت کبھی بھی فائنل میں آمنے سامنے نہیں آئے۔ اگر دونوں ٹیمیں اتوار کو دبئی میں ہونے والے فائنل میں پہنچتی ہیں تو یہ تاریخ ساز موقع ہو گا۔
بھارت نے اس ایڈیشن میں اب تک پاکستان کو دونوں میچز میں شکست دی ہے اور مجموعی طور پر دونوں ملکوں کے درمیان 15 ٹی 20 مقابلوں میں سے 12 میں کامیابی حاصل کی ہے۔ بھارت نے ستمبر 2022 کے بعد سے پاکستان کے خلاف 7 لگاتار میچز (4 ٹی ٹوئنٹی، 3 ون ڈے) بھی جیتے ہیں۔
بھارتی کپتان سوریہ کمار یادو نے دعویٰ کیا تھا کہ ’اب پاکستان بھارت کی حریف ٹیم نہیں رہی‘۔ اس بیان پر ردعمل دیتے ہوئے شاہین نے کہا ’یہ ان کی رائے ہے، جو چاہیں کہیں۔ جب وہ فائنل میں پہنچیں گے تو دیکھ لیں گے۔ ہمارا مقصد صرف ایشیا کپ جیتنا ہے اور اس کے لیے ہم بھرپور محنت کریں گے۔‘
یہ بھی پڑھیں: ’پرفارمنس زیرو اور غرور 100 فیصد‘، شاہین شاہ آفریدی رویے کی وجہ سے تنقید کی زد میں
یاد رہے کہ سپر فور مرحلے کے اہم میچ میں پاکستان نے سری لنکا کو 5 وکٹوں سے شکست دے کر ایونٹ میں اپنی پوزیشن مستحکم کی، شاہین شاہ آفریدی نے شاندار بولنگ کرتے ہوئے 28 رنز کے عوض 3 وکٹیں حاصل کیں۔
