وزیراعلیٰ پنجاب مریم نواز نے فیصل آباد میں الیکٹرک بس پراجیکٹ کی افتتاحی تقریب سے خطاب کرتے ہوئے کہا کہ شہر میں جس طرح میرا استقبال کیا گیا اس پر سب کا شکر گزار ہوں۔
انہوں نے کہا کہ جب ہم بجلی کے بلوں سے پنجاب کے شہریوں کو ریلیف دیں اور نہریں نکالیں تو آپ کو کیوں تکلیف ہوتی ہے؟ ہم پر اس لیے تنقید ہو رہی ہے کیوں کہ ہم نے سیلاب کے بعد دنیا سے بھیک نہیں مانگی۔ ہر مسئلے کا علاج بینظیر انکم سپورٹ پروگرام نہیں، یہ پروگرام 10، 10 ہزار روپے دیتا ہے ہم نے متاثرین کو 10، 10 لاکھ روپے دینے ہیں، براہ مہربانی اپنے مشورے اپنے پاس رکھیں۔
یہ بھی پڑھیے: پنجاب میں ایکو فرینڈلی ٹرانسپورٹ کا نیا دور، میانوالی میں الیکٹرک بس سروس کا آغاز
وزیراعلیٰ نے کہا کہ اگر کوئی مجھ پر تنقید کرتا ہے تو کرے لیکن کوئی پنجاب پر تنقید کرے گا تو گھر چھوڑ کر آجاؤں گی اور مریم نواز آپ کو چھوڑے گی نہیں، پنجاب نے آپ کے معاملات میں مداخلت نہیں کی تو آپ ہمارے معاملات میں مداخلت کیوں کررہے ہیں؟
یہی وہ پاکستان ہے جس کے بارے کہا جاتا تھا کہ یہ ایک ڈیفالٹ ملک ہے، مگر اب وہ ڈیفالٹ کہاں گیا؟
وجہ کیا ہے؟ ہمارے پاس کوئی جادو کی چھڑی نہیں! اصل وجہ یہ ہے کہ ہماری سیاسی قیادت اور عسکری قیادت فیلڈ مارشل عاصم منیر، سب نے اس ملک کی خدمت میں دن رات محنت کی ہے۔ وزیراعلیٰ مریم نواز pic.twitter.com/lbqdRuZpxn— WE News (@WENewsPk) September 29, 2025
مریم نواز نے کہا کہ ڈیڑھ سو الیکٹرک بسس لے کر آئی ہوں، فیصل آباد کو 90، جھنگ کو 30، چینیوٹ اور ٹوبہ ٹیک سنگھ کو 15، 15 بسس دی جائیں گی۔ پہلے بڑے شہروں میں ترقی پہلے آتی تھی لیکن ہم نے میانوالی سے الیکٹرک بسس کا آغاز کیا۔ ان بسس کا کرایہ صرف اور صرف 20 روپے ہے۔ ان میں فری وائی فائی اور اے سی ملے گی، خواتین کے لیے الگ جگہیں مختص ہیں۔
انہوں نے کہا کہ خوشی ہے کہ پنجاب اپنے صوبے کو یورپ جیسی ٹرانسپورٹ مہیا کر رہا ہے، آئندہ چند ہفتوں میں فیصل آباد میں میٹرو کی تعمیر شروع کررہے ہیں، لاہور اور پنڈی میں بھی میٹرو ٹرین لارہے ہیں۔
یہ بھی پڑھیے: پنجاب کے تمام اضلاع میں جدید ترین الیکٹرک بسیں کب سے چلنا شروع ہونگی اور کرایہ کتنا ہوگا؟
وزیراعلیٰ نے کہا کہ پنجاب میں تباہ کن سیلاب آیا، لیکن ہم نے راتیں جاگ کر گزاریں اور ڈھائی ملین افراد کو ریسکیو کیا، ان لوگوں کو نہیں نکلاتے تو تباہی ہوتی، پنجاب کے لیے ہر شہری کی جان قیمتی ہے، سیلاب متاثرین کو متاثرین نہیں مہمان سمجھا اور ان کے مال مویشیوں کو بھی بچایا۔
انہوں نے کہا کہ کینسر کی بعض اقسام کا 60 منٹ میں علاج کرنے والی مشین فیصل آباد کے لیے آرڈر کر دی ہے، بہت جلد ٹریک لیس ٹرین فیصل آباد کی سڑکوں پہ دوڑتی نظر آئے گی، 40 بلین روپے سے شروع کیے جانے والا واٹر سینٹیشن پلان کا بھی جلد آغاز کررہے ہیں۔
یہ بھی پڑھیے: خیبرپختونخوا: ٹیچنگ لائسنس متعارف کرنے کا فیصلہ، طریقہ کار کیا ہوگا؟
انہوں نے دعویٰ کیا کہ خیبرپختونخوا میں پی ٹی آئی کے جلسے میں ایک دوسرے کو جوتے مارے گئے، جب توجہ غلط کاموں اور بدتمیزی سکھانے میں خرچ ہوگی تو یہی ہوگا جو ان کے ساتھ ہورہا ہے، حرم شریف کے برآمدوں میں ن لیگ کی خواتین پر آوازیں کسیں۔ اب دنیا دیکھتی رہ جاتی ہے کہ شہباز شریف جہاں جاتے ہیں دنیا انہیں عزت دیتی ہے۔
اس موقع پر وزیراعلیٰ نے رانا ثنا اللہ کو سینیٹر بننے پر مبارکباد بھی دی اور پارٹی کے لیے ان کی خدمات کو خراج تحسین پیش کیا۔
