دنیا کے خوبصورت ترین دیہات کی 2025 کی فہرست میں ترکیہ کے تاریخی قصبے اورتاحصار نے بھی جگہ بنالی ہے، بین الاقوامی جریدے فوربز کی جانب سے جاری کردہ سالانہ رینکنگ میں اورتاحصار کو دنیا کے 50 خوبصورت ترین دیہات میں 40 واں نمبر حاصل ہوا۔
ترکی کے صوبے نیوشیہر میں واقع اورتاحصار، خطہ کپادوکیہ کے دل میں بسنے والا ایک دلکش گاؤں ہے جو اپنی قدرتی خوبصورتی، منفرد پتھریلے مناظر اور تاریخی ورثے کے باعث دنیا بھر کے سیاحوں کو اپنی جانب کھینچتا ہے۔
یہ بھی پڑھیں: دنیا کے سب سے خوبصورت ممالک کون سے ہیں؟
اورتاحصار کی پہچان اس کے پتھر سے بنے گھروں، پرکشش پتھریلی گلیوں، قدیم چرچوں اور خانقاہوں سے ہوتی ہے، دیہات میں موجود سرچا، کامبازلی، تاوشانلی اور ہلاج دریسی جیسے تاریخی چرچ سیاحوں کے لیے خاص کشش رکھتے ہیں۔
جریدے نے اپنے تبصرے میں لکھا کہ اورتاحصار ایک ایسا قصبہ ہے جو کپادوکیہ کی زمین سے ایک بھولی بسری یادگار کی طرح ابھرتا ہے، جہاں قدیم قلعہ، غاروں میں تراشی گئی گزرگاہیں اور کبوتروں کے گھونسلوں جیسے آثار آج بھی اپنی تاریخی عظمت کا پتہ دیتے ہیں۔
اورتاحصار نہ صرف ترکی کا خوبصورت ترین گاؤں قرار دیا جارہا ہے بلکہ یہ کپادوکیہ کے ثقافتی، قدرتی اور تاریخی ورثے کا جیتا جاگتا میوزیم بھی ہے۔
یہ بھی پڑھیں: بھارتی صحافی نے اسلام آباد کو ایشیا کا خوبصورت ترین شہر قرار دیدیا
یہاں آنے والے سیاح اورتاحصارقلعہ، ہلاج خانقاہ، پنچرلک چرچ، اور ایتھنوگرافی میوزیم ہے کے علاوہ ریڈ ویلی، پیجن ویلی اور لوو ویلی جیسے دلکش مقامات کا نظارہ کرتے ہیں۔
علاوہ ازیں، سورج نکلنے کے وقت فضا میں تیرتے ہوا کے غبارے، گھڑ سواری اور پہاڑی راستوں پر ہائیکنگ جیسی سرگرمیاں اس علاقے کو دنیا بھر کے سیاحوں کے لیے ایک خوابناک تجربہ بنا دیتی ہیں۔
