قومی کرکٹ ٹیم کے کپتان شان مسعود نے کہا کہ اس بار نسبتاً بہتر تیاری ہے، حالیہ سیریز ہمارے لیے ایک اچھا موقع ہے کہ اپنی کارکردگی بہتر بنائے۔
لاہور میں جنوبی افریقہ کے خلاف ٹیسٹ سیریز سے قبل پریس کانفرنس سے خطاب کرتے ہوئے انہوں نے کہا کہ ساجد خان ہمارے اہم کھلاڑی ہیں، انہیں وائرل فلو ہوا تھا اب واپس آگئے ہیں، ہم اپنی میڈیکل ٹیم سے بات کریں گے، ہم وقت لے کر ان کے حوالے سے فیصلہ کریں گے۔
یہ بھی پڑھیے: پاکستان بمقابلہ جنوبی افریقہ سیریز کی نشریاتی تفصیلات جاری
شان مسعود نے اپنی کارکردگی سے متعلق پوچھے گئے ایک سوال کے جواب میں کہا کہ ہم نہیں چاہتے کہ ایسا پِچ بنائے جس میں ٹیسٹ میچز ڈرا ہو، زیادہ رنز کے بجائے ہم 20 وکٹیں لینے پر زیادہ توجہ دیں گے، ایسے میں ہمیں اپنی توقعات کھلاڑیوں سے کم رکھنی چاہئیں۔
انہوں نے کہا کہ کوشش ہوگی کہ ہوم گراونڈ پر زیادہ سے زیادہ میچز جیتیں، باولنگ پر کام کیا ہے اور فیلڈنگ کو مزید بہتر بنانے کی ضرورت ہے۔
یہ بھی پڑھیے: جنوبی افریقہ کی پاکستان میں اسپن وکٹوں کے لیے خصوصی تیاریاں مکمل
اس موقع پر جنوبی افریقہ کے کپتان ایڈن مارکرام نے کہا کہ پچھلے سائیکل میں ہم نے اچھا پرفارم کیا، ہم پاکستان میں اسپن وکٹ کی توقع کررہے ہیں، بابر اعظم کی وکٹ اہم ہوتی ہے ان کو آوٹ کرنے کی کوشش کریں گے۔
انہوں نے کہا کہ پاکستان اپنے ہوم گراؤنڈ پر کھیل رہا ہے جس کا اسے فائدہ ہوگا لیکن ہم اپنی کوشش کریں گے، ہم آج پِچ دیکھیں گے اور مشاورت کے بعد ٹیم کا فیصلہ کریں گے۔
واضح رہے کہ پاکستان بمقابلہ جنوبی افریقہ یہ سیریز آئی سی سی ورلڈ ٹیسٹ چیمپیئن شپ 27-2025 کا حصہ ہے۔ پہلا ٹیسٹ 12 اکتوبر سے شروع ہوگا اور دوسرا راولپنڈی اسٹیڈیم میں 20 تا 24 اکتوبر کھیلا جائے گا۔
