قطر نے متحدہ عرب امارات کو 1-2 سے شکست دے کر فیفا ورلڈ کپ 2026 میں جگہ بنالی۔
یہ بھی پڑھیں: فیفا ورلڈ کپ 2026 کے لیے ٹکٹس کی فروخت کا آج سے آغاز، اس بار قیمتیں کیا رکھی گئیں؟
آج کا میچ دوحہ کے جاسم بن حمد اسٹیڈیم میں کھیلا گیا، جہاں آغاز سے ہی دونوں ٹیموں کے درمیان سخت مقابلہ رہا، تاہم قطر نے بہتر حکمتِ عملی اور مؤثر کھیل کے ذریعے برتری حاصل کی۔
2 گول کی برتری کے بعد یو اے ای نے آخری لمحات میں ایک گول کیا، مگر قطر کی برتری برقرار رہی اور وہ فاتح ٹھہرا۔
دوسری جانب افریقہ میں کھیلے گئے ورلڈ کپ کوالیفائر کے فیصلہ کن میچ میں کیپ وردے نے اسواتینی کو صفر کے مقابلے میں تین گول سے شکست دے کر گروپ ڈی میں پہلی پوزیشن حاصل کی اور براہِ راست ورلڈ کپ کے لیے کوالیفائی کرلیا۔
میچ میں ڈائلون لیورامینٹو نے 48ویں منٹ میں پہلا گول کیا، جس کے چند منٹ بعد ویلی سیمیڈو نے 54ویں منٹ میں اسکور کو دگنا کردیا۔ انجری ٹائم میں اسٹوپیرا نے تیسرا گول کر کے ٹیم کی فتح کو یقینی بنایا۔ کامیابی کے بعد کھلاڑیوں اور شائقین نے میدان میں زبردست جشن منایا۔
اعداد و شمار کے مطابق کیپ وردے آبادی کے لحاظ سے ورلڈ کپ میں شرکت کرنے والا دنیا کا دوسرا سب سے چھوٹا ملک بن گیا ہے۔ اس سے قبل 2018 کے ٹورنامنٹ میں آئس لینڈ نے یہ اعزاز حاصل کیا تھا۔
یہ بھی پڑھیں: صدر ٹرمپ نے دسمبر میں فیفا ورلڈ کپ ڈرا کا اعلان کردیا
فیفا ورلڈ کپ 2026 امریکا، میکسیکو اور کینیڈا میں منعقد ہوگا، جس میں پہلی بار ریکارڈ 48 ٹیمیں حصہ لیں گی۔
