پاکستان کا مشہور ڈراما پری زاد اب عربی زبان میں بھی دیکھا جا سکے گا ۔حال ہی میں ڈرامےکا ٹیزر جاری کیا گیا ہے جس میں ڈرامے کا عربی نام قریباً لکھا دیکھا جا سکتا ہے۔
پاکستان کے نجی ٹیلی ویژن چینل پر نشر کیے جانے والے ڈرامے پری زاد نے اپنی منفرد کہانی سے پہلی ہی قسط نشر ہونے کے بعد لوگوں کے دل جیت لیے تھے۔
ڈرامہ پری زاد ہاشم ندیم کے ناول پر مبنی ہے۔اس ڈرامے کا مرکزی کردار پری زاد اداکار احمد علی اکبر نے نبھایا تھا۔
ڈرامہ پری زاد کی کہانی ایک ایسے نوجوان کے گرد گھومتی ہے جسے رنگ کالا ہونے کی وجہ سے زندگی کے ہر قدم پر دھتکارا جاتا ہے۔
حال ہی میں ڈرامہ پری زاد کا سماجی رابطے کی ویب سائٹ انسٹا گرام پر عربی زبان میں ٹیزر جاری کیا گیا ہے۔عربی زبان میں اس ڈرامے کا نام قریباً ہے۔
View this post on Instagram
نجی ٹیلی ویژن چینل کی جانب سےڈرامے کا ٹیزر شیئر کرتے ہوئے لکھا گیا کہ ایک لازوال شاہکار کے لیے تیار ہوجاؤ!پاکستانی ڈرامہ سیریل جس نے لاکھوں لوگوں کو مسحور کیا اب پاکستان کے پہلے عربی تفریحی یوٹیوب چینل پر عربی بولنے والے ناظرین کو مسحور کرنے کے لیے تیار ہے۔
29اقساط پر مشتمل ڈرامہ سیریل پری زاد کی کاسٹ میں احمد علی اکبر کے علاوہ دیگر اداکاروں میں یمنی زیدی، اشنا شاہ، مشال خان، صبور علی، عروہ حسین،کرن تعبیراور نعمان اعجاز شامل ہیں۔
2021اور 2022کے بلاک بسٹر ڈرامہ کے ہدایت کار شہزاد کشمیری ہیں۔
