مائیکروسافٹ ٹیمز نے ایک نیا فیچر متعارف کرانے کی تیاری کرلی ہے جو ملازمین کا کام کی جگہ کا اسٹیٹس خودکار طور پر اپ ڈیٹ کرے گا مثلاً جب کسی ملازم کا آلہ کمپنی کے مخصوص وائی فائی نیٹ ورک سے جڑ جائے تو اس کا اسٹیٹس ’in the office‘ میں تبدیل ہو جائے گا۔
یہ فیچر اداروں کو ہائبرڈ ورک ماڈلز میں سہولت فراہم کرے گا، تاکہ دفتر یا ریموٹ ورکنگ کی نگرانی زیادہ منظم ہو سکے۔ تاہم ماہرین کے مطابق یہ نیا نظام ملازمین کی پرائیویسی سے متعلق اہم سوالات بھی اٹھا رہا ہے۔
مزید پڑھیں: ’اسکائپ‘ 22 سال بعد بند، ایک عہد کا اختتام
مائیکروسافٹ کے مطابق یہ فیچر فی الحال پری ویو مرحلے میں ہے اور اسے فعال کرنے کے لیے صارف کی رضامندی لازمی ہوگی۔ کمپنیوں کو اپنے “Places Directory” میں عمارتوں اور وائی فائی نیٹ ورکس کی تفصیلات پہلے سے رجسٹر کرنی ہوں گی۔
پاکستان میں، جہاں ہائبرڈ ورک کلچر تیزی سے فروغ پا رہا ہے، یہ فیچر حاضری کے نظم و ضبط، ڈیسک بُکنگ اور آفس مینجمنٹ کو آسان بنا سکتا ہے، مگر ماہرین کا کہنا ہے کہ اس کے ساتھ ڈیٹا تحفظ اور ملازم کی نجی زندگی کے احترام کو یقینی بنانا بھی ضروری ہے۔
مزید پڑھیں: اسکائپ کی بندش کے امکانات: کون سی ایپس متبادل ہوسکتی ہیں؟
قانونی ماہرین کے مطابق پاکستان میں ابھی تک مکمل ڈیٹا پروٹیکشن قانون نافذ نہیں ہوا، جبکہ موجودہ ضوابط میں ملازمین کی لوکیشن مانیٹرنگ کے حوالے سے واضح رہنمائی نہیں ہے۔
فیچر کے مؤثر استعمال کے لیے ماہرین نے تجویز دی ہے کہ ادارے تمام متعلقہ ملازمین سے رضامندی حاصل کریں، واضح طور پر بتائیں کہ لوکیشن ڈیٹا کس مقصد کے لیے استعمال ہوگا اور یہ سہولت تعاون کے لیے ہو، نگرانی کے لیے نہیں۔
