جنوبی افریقہ کے خلاف 3 ون ڈے میچز کھیلنے کے بعد پاکستان کرکٹ ٹیم سری لنکا کے خلاف بھی اتنی ہی تعداد میں ایک روزہ میچز کھیلے گی۔ اس حوالے سے پاکستان کرکٹ بورڈ (پی سی بی) نے ٹکٹس کی فروخت اور قیمتوں کے حوالے سے تفصیلات جاری کردی ہیں۔
پی سی بی کے اعلامیے کے مطابق پاک سری لنکا ون ڈے سیریز کے ٹکٹس منگل 4 نومبر سے دستیاب ہوں گے۔
View this post on Instagram
’یہ ٹکٹس آن لائن دوپہر 12 بجے پی سی بی کی ویب سائٹ پر خریدے جا سکتے ہیں اور ہر شناختی کارڈ پر زیادہ سے زیادہ 5 ٹکٹس خریدے جا سکیں گے۔‘
اعلامیے میں بتایا گیا ہے کہ جنرل انکلوژرز کے ٹکٹس ابتدائی 2 میچز کے لیے 200 روپے اور آخری میچ کے لیے 300 روپے میں دستیاب ہوں گے۔
’فرسٹ کلاس انکلوژرز کے ٹکٹس 300 اور 400 روپے میں، پریمیئم انکلوژرز 400 اور 500 روپے میں جبکہ وی آئی پی انکلوژرز کے ٹکٹ 500 اور 600 روپے میں خریدے جا سکتے ہیں۔‘
واضح رہے کہ پاک سری لنکا سیریز کے تمام میچز 11، 13 اور 15 نومبر کو راولپنڈی کرکٹ اسٹیڈیم میں کھیلے جائیں گے۔
