قومی اسمبلی کو بتایا گیا کہ پاکستانی پاسپورٹ کی عالمی رینکنگ میں نمایاں بہتری آئی ہے اور اب یہ دنیا کے 100 بہترین پاسپورٹس میں شامل ہو چکا ہے۔
یہ بات وزیر برائے پارلیمانی امور ڈاکٹر طارق فضل چوہدری نے سوالات کے دوران قومی اسمبلی میں بتائی۔
انہوں نے ہینلی پاسپورٹ انڈیکس 2025 کا حوالہ دیتے ہوئے کہا کہ پاکستانی پاسپورٹ نے 20 درجے بہتری حاصل کی ہے۔
یہ بھی پڑھیں: پاکستان نے پاسپورٹ سے ’اسرائیل کے لیے ناقابل استعمال‘ کی شق ہٹانے کا بھارتی دعویٰ مسترد کردیا
وزیر نے بتایا کہ پاکستان نے 50 ممالک کے ساتھ سفارتی اور سرکاری پاسپورٹس کے حامل افراد کے لیے ویزا استثنیٰ معاہدے کیے ہیں۔
انہوں نے مزید کہا کہ پاکستانی پاسپورٹ کی رینکنگ میں بہتری کے لیے کئی اقدامات اٹھائے گئے ہیں۔
ایک سوال کے جواب میں ڈاکٹر طارق فضل چوہدری نے کہا کہ تمام جعلی کمپیوٹرائزڈ شناختی کارڈز اور پاسپورٹس منسوخ کر دیے جائیں گے۔
مزید پڑھیں: پاسپورٹ میں تبدیلی سے متعلق افواہوں پر محکمہ امیگریشن اینڈ پاسپورٹس نے خاموشی توڑ دی
اسی دوران، قومی اسمبلی میں سوالات کے دوران انہوں نے بتایا کہ اسلام آباد میں آئندہ ماہ کے آخر تک 30 مقامات پر عوامی مفت انٹرنیٹ سہولت فراہم کی جائے گی۔
وزیر نے کہا کہ کیپٹل ڈویلپمنٹ اتھارٹی اور نیشنل ٹیلی کمیونیکیشن اتھارٹی کے تعاون سے 30 ایسے مقامات کی نشاندہی کی گئی ہے جہاں عوام کو مفت وائی فائی کی سہولت دستیاب ہو گی۔
یہ سہولت 15 میٹرو بس اسٹیشنوں سے لے کر دارالحکومت کے ایف 6 اور ایف 7 مراکز تک بھی فراہم کی جائے گی۔
مزید پڑھیں: وفاقی سرکاری ملازمین کے لیے جڑواں شہروں سمیت 13بڑے شہروں میں ہاؤسنگ منصوبے شروع کرنے کا فیصلہ
اس کے علاوہ، سی ڈی اے اسپتال، جاپانی پارک، لیک ویو پارک، دامن کوہ، فاطمہ جناح پارک، سنڈے بازار جی 6، سنڈے بازار ایچ 9، ایف 6 اور ایف-7 مراکز میں بھی وائی فائی کی سہولت دستیاب ہوگی۔
ایک اور سوال کے جواب میں، ڈاکٹر طارق فضل چوہدری نے کہا کہ وزیر اعظم شہباز شریف نے دارالحکومت کی 50 سال کے پانی کی ضروریات کو پورا کرنے کے لیے وزارت داخلہ کے تحت ایک کمیٹی تشکیل دی ہے۔
مزید پڑھیں: پولیو کے قطرے پلانے سے انکار کرنے والے والدین کے شناختی کارڈ، موبائل سمز اور پاسپورٹ بلاک کرنے پر غور
انہوں نے بتایا کہ چراہ ڈیم یا شاہدرہ ڈیم کو سسٹم میں شامل کیا جائے گا اور غازی بروتھا اور خان پور ڈیم سے بھی مزید پانی کی فراہمی کے لیے اقدامات کیے جا رہے ہیں تاکہ جڑواں شہروں پانی کی ضروریات کو 50 سال تک پورا کیا جا سکے۔
ایک توجہ دلانے والے نوٹس کے جواب میں، وزیر برائے پارلیمانی امور نے کہا کہ اسلام آباد کیپٹل ٹیریٹری میں صفائی کے امور کے تحت گھروں سے ٹھوس فضلہ اکٹھا کیا جاتا ہے اور ایک طے شدہ طریقہ کار کے تحت اسے تلف کیا جاتا ہے۔
