چیف آف آرمی اسٹاف جنرل سید عاصم منیر نے کہا ہے کہ شہداء کی قربانیاں اور غازیوں کی خدمات ہمارا قیمتی اثاثہ اور سرمایہِ افتخار ہیں۔ بلاشبہ شہداء کی فرض شناسی اور عظیم قربانیوں کے طفیل ہم ایک آزاد فضا میں زندگی بسر کر رہے ہیں۔
انٹر سروسز پبلک ریلیشنز (آئی ایس پی آر) کے مطابق جنرل ہیڈ کوارٹرز (جی ایچ کیو) راولپنڈی میں شہداء اور غازیوں کے اعزاز میں تقریبِ تقسیم اعزازات سے خطاب کرتے ہوئے جنرل سید عاصم منیر نے کہا کہ پاک فوج بطور ادارہ اپنے سے منسلک ہر فرد کو اور اس کے لواحقین کو ہمیشہ یاد رکھتا ہے اور ہمارا یہ رشتہ بطور خاندان قابلِ فخر اور فقید المثال ہے۔
افواج پاکستان کا ہر آفیسر اور اہلکار تعصبات سے بالا تر ہو کر فرائض انجام دیتا ہے
آرمی چیف نے کہا کہ افواجِ پاکستان کا ہر سپاہی اور آفیسر تمام علاقائی، لسانی اور سیاسی تعصبات اور امتیازات سے بالاتر ہو کر صرف اور صرف اپنے فرائض اور ذمہ داریوں کو مقدم رکھتا ہے۔ مضبوط فوج مملکت کی سلامتی اور اتحاد کی ضامن ہوتی ہے۔
آرمی چیف نے حالیہ دنوں میں فوجی تنصیبات، یادگاروں اور شہداء کی حرمتوں پر حملوں کو انتہائی افسوس ناک قرار دیتے ہوئے کہا کہ یہ ناقابلِ برداشت ہیں۔
اس موقع پر چیف آف آرمی اسٹاف جنرل سید عاصم منیر نے 25 مئی کو ’یومِ تکریمِ شہداءِ پاکستان‘ منانے کا اعلان بھی کیا۔
آئی ایس پی آر کے مطابق تقریب میں چیف آف آرمی سٹاف جنرل سید عاصم منیرنے آپریشنز کے دوران بہادری اور قوم کے لیے شاندار خدمات پر پاک فوج کے افسران و جوانوں کو فوجی اعزازات سے نوازا۔
51 افسران کو ستارہ امتیاز(ملٹری) ،22 افسران و جوانوں کو تمغہ بسالت اور 2 جوانوں کو اقوامِ متحدہ کے خصوصی میڈل کے اعزاز سے نوازا گیا۔
آئی ایس پی آر نے بتایا کہ جی ایچ کیو میں ہونے والی تقریب میں بڑی تعداد میں پاک فوج کے سینیئر افسران اور شہدا کے اہل خانہ نے شرکت کی۔
