گورنر خیبر پختونخوا فیصل کریم کنڈی نے کہا ہے کہ صوبہ بین الاقوامی کرکٹ کی میزبانی کے لیے پوری طرح تیار ہے۔
وہ اتوار کے روز ملتان سلطان کے سابق مالک علی ترین کے ہمراہ ارباب نیاز اسٹیڈیم کے دورے پر گئے، جہاں انہوں نے اسٹیڈیم کی موجودہ صورتحال، سہولیات اور انتظامات کا جائزہ لیا۔
یہ بھی پڑھیں: جنوبی افریقہ کے اسٹار کھلاڑی نے آئی پی ایل کے بجائے پی ایس ایل کھیلنے کا فیصلہ کرلیا
سوشل میڈیا پلیٹ فارم ایکس پر اپنی ایک پوسٹ میں گورنر کنڈی کا کہنا تھا کہ پشاور اور خیبر پختونخوا کے لوگ بین الاقوامی کرکٹ کا خیرمقدم کرنے کے لیے مکمل طور پر تیار ہیں۔
Visited Arbab Niaz Stadium today with @aliktareen. We, the people of Peshawar and Khyber Pakhtunkhwa, are fully prepared to welcome international cricket. We look forward to hosting PSL in the coming days and reaffirming KP’s place on Pakistan’s cricketing map.@TheRealPCB… pic.twitter.com/CZ4gyn7Vfr
— Faisal Karim Kundi (@fkkundi) December 1, 2025
انہوں نے مزید کہا کہ صوبہ آئندہ دنوں میں پاکستان سپر لیگ یعنی پی ایس ایل کی میزبانی کے لیے پرجوش ہے اور اس سے خیبر پختونخوا کی کرکٹ میں اہمیت مزید اجاگر ہوگی۔
انہوں نے اپنے پیغام میں پاکستان کرکٹ بورڈ، چیئرمین پی سی بی محسن نقوی اور پی ایس ایل حکام کو ٹیگ کرتے ہوئے امید ظاہر کی کہ جلد پشاور، پاکستان کے کرکٹ نقشے پر اپنا مقام دوبارہ مضبوط کرے گا۔
مزید پڑھیں: پی ایس ایل میں نئی ٹیموں کا فیصلہ کون اور کیسے کرے گا، پی سی بی نے واضح کردیا
ارباب نیاز اسٹیڈیم کی بحالی اور جدید تقاضوں سے ہم آہنگ بنانے کے لیے جاری اقدامات پر بھی اعتماد کا اظہار کیا گیا۔
گورنر خیبر پختونخوا نے کہا کہ صوبے کے عوام کرکٹ کے حوالے سے نہایت پرجوش ہیں اور پی ایس ایل میچوں کے انعقاد سے خطے میں کھیلوں کی سرگرمیاں نئی توانائی کے ساتھ بحال ہوں گی۔
