بنگلہ دیش ملٹری اکیڈمی بھاتیاری میں آج صدر کی کمانڈنگ پریڈ کا انعقاد کیا گیا، جس میں 89ویں بی ایم اے لانگ کورس اور 60ویں بی ایم اے اسپیشل کورس کے آفیسر کیڈٹس نے حصہ لیا۔
چیف آف آرمی اسٹاف جنرل وقارالزمان تقریب کے مہمان خصوصی تھے۔ انہوں نے پریڈ کا معائنہ کیا، کیڈٹس کو سلامی دی اور اعلی کارکردگی دکھانے والے کیڈٹس میں انعامات تقسیم کیے۔
یہ بھی پڑھیں: پروفیسر یونس کے روڈ میپ کی حمایت کرتے ہیں، نئے انتخابات کے بعد استحکام آئےگا، بنگلہ دیشی فوج
نئے کمیشن یافتہ افسران سے خطاب کرتے ہوئے آرمی چیف نے کہا کہ انہوں نے اپنی قسم کے ذریعے ملک کی آزادی اور خودمختاری کے دفاع کی مقدس ذمہ داری قبول کی ہے۔
انہوں نے بنگلہ دیش آرمی کو جدید فوجی ٹیکنالوجی سے لیس، تربیت یافتہ اور منظم قوت میں تبدیل کرنے کے عزم کا اعادہ کیا۔
انہوں نے بی ایم اے کے کمانڈنٹ اور تمام افسران، این سی اوز، جے سی اوز، سپاہیوں اور سول اسٹاف کا شاندار پریڈ کے انعقاد پر شکریہ ادا کیا۔
مزید پڑھیں: قومی مفاد سب سے مقدم، ملکی خودمختاری پر کوئی سمجھوتہ نہیں کریں گے، بنگلہ دیشی فوج کا عزم
سخت فوجی تربیت کے بعد کل 204 کیڈٹس نے کمیشن حاصل کیا، جن میں 184 کیڈٹس 89ویں لانگ کورس سے اور 20 کیڈٹس 60ویں اسپیشل کورس سے تھے۔
اس بیچ میں 183 مرد اور 21 خواتین افسران شامل ہیں۔
کمپنی سینیئر انڈر آفیسر اعظمین اشراق کو بہترین کیڈٹ کے طور پر ’سوورڈ آف آنر‘ اور فوجی تعلیم میں بہترین کارکردگی کے لیے چیف آف آرمی اسٹاف کا گولڈ میڈل دیا گیا۔
پریڈ کے بعد، نئے کمیشن یافتہ افسران نے ملک کی خودمختاری کے تحفظ کی رسمی قسم اٹھائی، کیڈٹس کے والدین اور سرپرستوں نے نئے افسران کے رینک بیجز لگائے۔
