پاکستان نے سوڈان میں اقوامِ متحدہ کے امن فوجیوں پر ہونے والے حملے کی شدید ترین الفاظ میں مذمت کی ہے۔
مذکورہ حملے میں اقوامِ متحدہ کی عبوری سیکیورٹی فورس برائے ابیئی میں خدمات انجام دینے والے بنگلہ دیش کے 6 امن فوجی جاں بحق جبکہ متعدد دیگر زخمی ہوگئے۔
یہ بھی پڑھیں: یواین سیکریٹری جنرل کا چیف ایڈوائزر سے ٹیلیفونک رابطہ، سوڈان میں بنگلہ دیشی فوجیوں کی شہادت پر اظہار افسوس
دفتر خارجہ کے ترجمان کی جانب سے جاری بیان میں کہا گیا ہے کہ پاکستان اس افسوسناک واقعے پر حکومتِ بنگلہ دیش اور اس کے عوام سے دلی تعزیت کا اظہار کرتا ہے اور اس المناک گھڑی میں سوگوار خاندانوں کے ساتھ مکمل یکجہتی کا اظہار کرتا ہے۔
🔊PR No.3️⃣7️⃣6️⃣/2️⃣0️⃣2️⃣5️⃣
Pakistan Condemns Attack on UN Peacekeepers in Kadugli
🔗⬇️https://t.co/gzsytFYCrz pic.twitter.com/9wJrA2xFUd
— Ministry of Foreign Affairs – Pakistan (@ForeignOfficePk) December 15, 2025
بیان میں کہا گیا کہ اقوامِ متحدہ کے امن فوجی دنیا بھر میں تنازعات کی روک تھام، شہریوں کے تحفظ اور امن کے قیام کے لیے صفِ اول میں خدمات انجام دے رہے ہیں۔
پاکستان نے امن اور علاقائی استحکام کے لیے اپنی جانوں کا نذرانہ پیش کرنے والے ان ’بلیو ہیلمٹس‘ کی عظیم قربانی کو خراجِ عقیدت پیش کیا۔
مزید پڑھیں: سوڈان میں شہید ہونے والے بنگلہ دیشی فوجی اہلکاروں کی تفصیل جاری
پاکستان نے مطالبہ کیا ہے کہ اس بزدلانہ حملے کی فوری اور شفاف تحقیقات کی جائیں، تاکہ ذمہ دار عناصر کی نشاندہی کرکے انہیں انصاف کے کٹہرے میں لایا جا سکے۔
بیان میں مزید کہا گیا کہ پاکستان اقوامِ متحدہ کی سلامتی کونسل کے اراکین اور عالمی برادری کے ساتھ مل کر اقوامِ متحدہ کے امن فوجیوں کے تحفظ اور سلامتی کو یقینی بنانے کے لیے اپنا کردار ادا کرتا رہے گا۔
