بین الاقوامی مالیاتی فنڈ (آئی ایم ایف) نے مختلف عوامل کے پیش نظر عالمی نمو میں بہتری اور دنیا میں کساد بازاری میں کمی واقع ہونے کا عندیہ دیا ہے۔
غیر ملکی خبر رساں ایجنسی رائٹرز کے مطابق آئی ایم ایف نے منگل کو امریکہ اور یورپ میں لچکدار طلب، توانائی کے اخراجات میں نرمی اور کورونا کی سخت پابندیوں کو ترک کرنے کی صورت میں چین کی معیشت کے دوبارہ کھلنے کی وجہ سے اپنا سال 2023 کے عالمی نمو کا نقطہ نظر قدرے بڑھا دیا۔
آئی ایم ایف کا کہنا ہے کہ عالمی نمو اب بھی 2023 میں 2.9 فیصد تک گرے گی جو کہ 2022 میں 3.4 فیصد تھی لیکن اس کی تازہ ترین ورلڈ اکنامک آؤٹ لک کی پیشگوئی اس سال اکتوبر میں 2.7 فیصد نمو کی پیشگوئی کے مقابلے میں بہتری کی جانب اشارہ کرتی ہے تاہم اس کے ساتھ خبردار بھی کیا گیا ہے کہ دنیا بآسانی کساد بازاری کا شکار بھی ہو سکتی ہے۔
آئی ایم ایف کا کہنا ہے کہ سال 2024 میں عالمی نمو میں تھوڑی تیزی آئے گی جو کہ 3.1 فیصد تک ہوگی۔
عالمی ادارے کے چیف ماہر اقتصادیات پیئر اولیور گورینچاس کا کہنا ہے کہ کساد بازاری کے خطرات کم ہو گئے ہیں اور مرکزی بینک مہنگائی کو کنٹرول کرنے میں پیش رفت کر رہے ہیں لیکن قیمتوں کو روکنے کے لیے مزید کام کرنے کی ضرورت ہے جبکہ یوکرین میں جنگ کے مزید بڑھنے اور کوویڈ 19 کے خلاف چین کی جنگ سے نئی رکاوٹیں بھی کھڑی ہوسکتی ہیں۔
گورنچاس کا مزید کہنا تھا کہ ہمیں غیر متوقع صورتحال کا سامنا کرنے کے لیے تیار رہنا ہوگا لیکن یہ ایک اہم موڑ کی نمائندگی بھی کرتا ہے جس میں ترقی کی شرح نیچے آتی ہے اور پھر افراط زر میں کمی ہوتی ہے۔
