راولپنڈی میں اڈیالہ جیل کے باہر دھرنے کے معاملے پر پاکستان تحریک انصاف کے بانی عمران خان، ان کی بہنوں اور پارٹی کے متعدد رہنماؤں کے خلاف دہشت گردی سمیت دیگر سنگین دفعات کے تحت مقدمہ درج کر لیا گیا ہے۔
پولیس کا کہنا ہے کہ دھرنے کے دوران امن و امان کی صورتحال خراب ہوئی اور مظاہرین کی جانب سے پولیس پر پٹرول بموں سے حملے کیے گئے، اہلکاروں پر تشدد کیا گیا جبکہ دفعہ 144 کی بھی خلاف ورزی کی گئی۔
یہ بھی پڑھیے: پولیس آپریشن، واٹر کینن کا استعمال، اڈیالہ جیل کے باہر پی ٹی آئی دھرنا ختم
پولیس کے مطابق تھانہ صدر بیرونی راولپنڈی میں درج کی گئی ایف آئی آر انسدادِ دہشت گردی ایکٹ کے تحت ہے، جس میں علیمہ خان، ڈاکٹر عظمیٰ خان، نورین نیازی، قاسم خان، سلمان اکرم راجا اور عالیہ حمزہ کو نامزد ملزمان میں شامل کیا گیا ہے۔
ایف آئی آر کے متن کے مطابق یہ مقدمہ مجموعی طور پر 35 نامزد اور 400 نامعلوم افراد کے خلاف درج کیا گیا ہے۔ نامزد دیگر افراد میں نعیم پنجوتھا، تابش فاروق، طیبہ راجا، نادیہ خٹک، ہارون، راجا اسد عباس، ظفر گوندل اور شفقت عباس کے نام بھی شامل ہیں۔
پولیس حکام کے مطابق موقع سے 14 ملزمان کو گرفتار کر کے انسداد دہشت گردی کی عدالت میں پیش کر دیا گیا ہے، جبکہ واقعے کی مزید تفتیش جاری ہے۔
پولیس کا کہنا ہے کہ دیگر ملوث افراد کی شناخت کے بعد ان کے خلاف بھی قانون کے مطابق کارروائی کی جائے گی۔
یہ بھی پڑھیے: عمران خان کی بہنوں کا اڈیالہ جیل کے قریب دھرنا جاری، پولیس کے علیمہ خان سے مذاکرات
واضح رہے کہ گزشتہ روز عمران خان سے ملاقات نہ ہونے پر ان کی بہنوں نے پی ٹی آئی کارکنوں کے ساتھ جیل کے قریب دھرنا دے دیا تھا، جسے ختم کرنے کے لیے پولیس نے رات گئے واٹر کینن کا استعمال کیا، جس کے بعد کارکنان منتشر ہوگئے۔
