وزیراعظم پاکستان شہباز شریف نے ٹیکس چوری کے خلاف اقدامات کو مزید تیز کرنے کی ہدایت کرتے ہوئے کہا ہے کہ ٹیکس چوری اور اسمگلنگ کرنے والوں کے ساتھ کسی قسم کی نرمی نہیں برتی جائےگی۔
وزیراعظم شہباز شریف کی زیر صدارت ایف بی آر کی کارکردگی کے حوالے سے ہفتہ وار جائزہ اجلاس ہوا، جس میں حکام نے انسداد اسمگلنگ اقدامات کی پیشرفت اور دیگر امور پر بریفنگ دی۔
مزید پڑھیں: ایف بی آر کی ٹیکس چوری میں ملوث جیولرز کیخلاف کارروائی کی تیاری، ڈیٹا بھی حاصل کرلیا
وزیراعظم نے انسداد اسمگلنگ کی کامیاب کارروائیوں پر ایف بی آر کی پذیرائی کی اور کہاکہ ہر سال قوم کا اربوں روپے کا قیمتی سرمایہ اسمگلنگ کی نذر ہوتا ہے۔
انہوں نے کہاکہ پاکستان کسٹمز کی کامیاب کارروائیوں سے اسمگلنگ میں خاطر خواہ کمی آنا قابل ستائش ہے، اسمگلنگ کی روک تھام سے متعدد اشیا اب قانونی طور پر درآمد ہو کر معیشت کا باضابطہ حصہ بن رہی ہیں۔
وزیراعظم نے ٹیکس چوری کے خلاف اقدامات کو مزید تیز کرنے کی ہدایت کرتے ہوئے کہاکہ ٹیکس چوری اور اسمگلنگ کرنے والوں کے ساتھ اب کوئی نرمی نہیں برتی جائےگی۔
وزیراعظم نے صوبائی حکومتوں کو غیر قانونی پیٹرول پمپس کے خلاف قانونی کارروائیوں میں ایف بی آر کے ساتھ مکمل تعاون کی ہدایت کی۔
اجلاس میں حکام نے بریفنگ دیتے ہوئے کہاکہ اسمگلنگ کی روک تھام کے لیے پورے ملک میں کسٹمز کا مربوط نظام نافذ ہے۔
حکام نے بتایا کہ ’راہگزر ایپ‘ کے ذریعے پورے ملک میں پیٹرول پمپس کی رجسٹریشن کی جا چکی ہے اور غیر قانونی پمپس کے خلاف قانونی کارروائی جاری ہے۔
بریفنگ میں بتایا گیا کہ ضلعی انتظامیہ کو نئے پیٹرولیم ایکٹ کے تحت غیر قانونی مشینری ضبط کرنے کا اختیار دیا گیا ہے، پیٹرولیم مصنوعات کی دروان نقل و حمل جی پی ایس ٹریکنگ کے لیے نظام نافذ العمل ہو چکا ہے۔
حکام نے بتایا کہ جولائی سے نومبر 2025 میں پیٹرولیم مصنوعات کی اسمگلنگ روکنے کے نتیجے میں گزشتہ سال کے مقابلے میں محصولات میں 82 فیصد اضافہ ہوا ہے۔
مزید پڑھیں: ٹیکس چوروں کے گرد گھیرا تنگ، ایف بی آر نے لسٹ جاری کر دی
حکام کے مطابق گزشتہ 5 ماہ میں سگریٹ، ٹائرز، کپڑے، الیکٹرانکس اور متعدد دیگر مصنوعات کی غیر قانونی اسمگلنگ کے خلاف اقدامات کے نتیجے میں محصولات میں اضافہ ہوا ہے۔
اجلاس میں وفاقی وزرا محمد اورنگزیب، احد چیمہ، وزیر مملکت برائے خزانہ بلال اظہر کیانی، چئیرمین ایف بی آر اور متعلقہ اداروں کے اعلیٰ افسران نے شرکت کی۔
